ஜனாதிபதி ஒபாமாவின் இரகசிய பேருந்து!

ஜனாதிபதி பராக் ஒபாமா இவ்வாரம் மூன்று மாநிலங்களுக்கும் பிரச்சாரத்தை மேற்கொள்வதற்காகப் புதிய, கறுப்புநிற கவசப் பேருந்தொன்று ஒழுங்குசெய்யப்பட்டுள்ளது.

இதில் காவற்றுறையினரின் வாகனங்களைப் போல எச்சரிக்கை வெளிச்சங்களும் காணப்படுகின்றன.

இது அண்மையில் இரகசியச் சேவையினரால் வாங்கப்பட்ட இரண்டு பேருந்துகளில் ஒன்றாகும். இது பராக் ஒபாமா, உப ஜனாதிபதி பிடேன், முதற்பெண்மணி போன்றவர்களைக் கொண்டுசெல்வதற்காகப் பயன்படுத்தப்படும் என தெரிவிக்கப்படுகின்றது.

ஒரு பேரூந்து ஒன்றினை 1.1 மில்லியன் டொலர் விலையில் Hemphil Brothers Coach நிறுவனத்திடமிருந்து இரகசியச் சேவைப் பிரிவினர் வாங்கியுள்ளனர்.

இதுபற்றி நிறுவனத்தினர் எந்தவிதமான விபரங்களையும் வெளியிடவில்லையெனினும், இதன் இணையத்தளத்தில் சில விற்கப்படவுள்ளன என்றும் கூறப்பட்டுள்ளது.

இரகசியச் சேவைப் பிரிவினர் தமது வாகனத்தொடரணியில் ஒரு பேருந்தை இணைத்தது இதுதான் முதலாவது தடவையாகும்.

‘நாங்கள் இதனை மிகவும் தாமதமாகவே இணைத்துள்ளோமென்று கூறலாம். 1980 களிலிருந்தே ஜனாதிபதிகளும் வேட்பாளர்களும் பேருந்துகளில் பிரயாணம் செய்திருக்கின்றார்கள்,’ என்கின்றது இரகசியச் சேவை.

கடந்த காலங்களில் இரகசியத் சேவையினர் பேருந்துகளை வாடகைக்கு எடுத்து, அவற்றிற்குக் கவசங்கள் மற்றும் முன்னேற்றகரமான தொலைத்தொடர்பு வசதிகளைச் செய்தே பயன்படுத்தினர்.

ஆனால் இதற்கெல்லாம் மாதம் ஒன்றிற்குப் பத்தாயிரக்கணக்கான டொலர்கள் செலவாகியது. இத்துடன் ஒப்பிடுகையில் இந்தப் புதிய பேருந்து பணவிரயத்தினையும் நேரவிரயத்தினையும் சேமிக்குமென இவர்கள் கூறுகின்றனர்.

இந்தப் பயணம் எப்படியிருக்கும்? எமக்கும் தெரியாது. இரகசியச் சேவையும் விபரங்களை வெளியிடாது. நிருபர்கள்தான் அதற்குள் என்ன உள்ளதென எட்டிப்பார்த்துச் சொல்லவேண்டும்.