ரொபேர்ட் ஓ பிளேக் : தமிழ் தேசிய கூட்டமைப்பு சந்திப்பு

by **நேசமுடன் ஹாசிம்** Tue 13 Sep 2011 - 9:06

ஐந்து நாள் சுற்றுப்பயணம் மேற்கொண்டு இலங்கை வந்தடைந்த அமெரிக்க பிரதி இராஜாங்க செயலாளர் ரொபேர்ட் ஓ பிளேக்

நேற்று தமிழ் தேசிய கூட்டமைப்பின் பாராளுமன்ற குழு தலைவர் இரா.சம்பந்தன் மற்றும் ஜனாதிபதி மகிந்த ராஜபக்ச ஆகியோரை சந்தித்தார்.

நேற்று காலை தமிழ் தேசிய கூட்டமைப்பினரை சந்தித்த அவர், இதன் போது தமிழ் மக்களின் தேசிய பிரச்சினைகள் பற்றி கேட்டறிந்ததாகவும், இச்சந்திப்பு மிகவும் திருப்திகரமானதாக இருந்ததாகவும் அவர் தெரிவித்துள்ளார்.

இதேவேளை இக்கூட்டத்தின் போது தமிழர்களுக்கான அரசியல் தீர்வு, தமிழ்த் தேசிய கூட்டமைப்பின் உடனான அரசின் பேச்சுவார்த்தை, வடக்கு கிழக்கில் மனித உரிமையின் நிலை, இராணுவ மயமாக்கல் மற்றும் நிலஅபகரிப்பு குறித்து கலந்துரையாடப்பட்டதாக தமிழ்த் தேசியக் கூட்டமைப்பின் பாராளுமன்ற உறுப்பினர் எம்.ஏ.சுமந்திரன் தெரிவித்துள்ளார்.

இச்சந்திப்பில் அமெரிக்க தூதுவர் திருமதி பெட்ரீசியா பூட்டனிஸும் கலந்து கொண்டுள்ளார். இச்சந்திப்பின் பின்னர் நேற்று மாலை ஜனாதிபதி மாளிகையில், ஜனாதிபதி மகிந்த ராஜபக்சவையும் ரொபேர்ட் ஓ பிளேக் சந்தித்து கலந்துரையாடினார். இதன்போது நல்லிணக்க ஆணைக்குழுவின் இறுதி அறிக்கை தொடர்பில் ரொபட் ஓ. பிளேக் ஜனாதிபதியிடம் கேட்டறிந்ததாக வெளிவிவகார அமைச்சர் ஜீ.எல்.பீரிஸ் தெரிவித்தார்.

ஜெனிவாவில் இன்று தொடங்கும் ஐ.நா மனித உரிமைகள் பேரவையின் 18 வது கூட்டத்தொடரில் அமெரிக்கா உட்பட பல நாடுகளினால் இலங்கைக்கு எதிரான அழுத்தம் பிரயோகிக்கப்படலாம் என எதிர்பார்க்கப்படும் நிலையில் ரொபேர்ட் ஓ பிளேக்கின் இலங்கை பயணம் முக்கியம் பெற்றுள்ளது.

இதேவேளை, நியூயோர்க்கில் ஆரம்பமாகவிருக்கும் ஐ.நா பொதுச்சபை கூட்டத்தில் ஜனாதிபதி மகிந்த ராஜபக்ச செப்.23ம் திகதி உரையாற்றவிருக்கிறார் என தெரிவிக்கப்படுகிறது.