டெல்லியில் 75 வயது பெண்ணின் மூக்கில் குடும்பம் நடத்திய புழுக்கள்

by **gud boy** Sun 18 Sep 2011 - 18:20

டெல்லியில் 75 வயது பெண்ணின் மூக்கில் குடும்பம் நடத்திய புழுக்கள்

புதுடெல்லி: வயதான பெண்ணின் மூக்கிற்குள் இருந்த நூற்றுக்கும் மேற்பட்ட உயிருள்ள புழுக்களை டாக்டர்கள் அறுவைசிகிச்சை செய்து அகற்றினர்.
டெல்லி பல்வால் பகுதியை சேர்ந்தவர் பகவதி தேவி(75). கடந்த இரண்டு மாதங்களாக இவரது முகத்தின் வலது பக்கத்தில் கடுமையான வலி இருந்தது. அதை கண்டுகொள்ளாமல் வலியை சகித்தபடி நாட்களை கடத்திக்கொண்டிருந்தார். சில நாட்களுக்கு பிறகு மூக்கில் இருந்து ரத்தம் வழிய தொடங்கியதும் பயந்துபோய் மருத்துவமனைக்கு சென்றார்.
பரீதாபாத்தில் உள்ள போர்டிஸ் எஸ்கார்ட்ஸ் மருத்துவமனை டாக்டர்கள் இவரை சோதித்தனர். தேவியின் மூக்குக்குள் நூற்றுக்கும் மேற்பட்ட உயிருள்ள புழுக்கள் இருப்பதை பார்த்து அதிர்ச்சி அடைந்தனர். ஒவ்வொன்றும் 1*0.3 செ.மீ. அளவுடையதாக இருந்தது. இதுகுறித்து இந்த மருத்துவமனையின் இஎன்டி டாக்டர் சஞ்சீவ் சாவ்லா தெரிவித்ததாவது:
தேவியின் மூக்கை எண்டோஸ்கோப்பி முறை மூலம் சோதனை செய்தோம். சிறிய கேமராவை மூக்குக்குள் அனுப்பி, அதில் தெரிந்த காட்சியை பெரிதுபடுத்தி பார்த்ததில் மூக்குக்குள் நூற்றுக்கும் மேற்பட்ட உயிருள்ள புழுக்கள் நெளிந்துகொண்டிருந்தன. உடனே அறுவை சிகிச்சைக்கு ஏற்பாடு செய்தோம்.
சைனஸ் பகுதியில் இந்த புழுக்கள் குகை போல் அமைத்து தங்கியிருந்தன. வலது கண் மூலைக்கும் வலது கன்னத்துக்கும் மூக்கு மற்றும் மூளை பகுதிக்கு தாழ்வாகவும் இவை இருந்தன. இவை எல்லாவற்றையும் ஒரே நேரத்தில் எடுப்பது சிரமம். அதனால் இரண்டு கட்டமாக அறுவைசிகிச்சை செய்ய முடிவெடுக்கப்பட்டது.
மயக்க மருந்து கொடுத்து ஆகஸ்ட் 25ம் தேதி முதல் அறுவைசிகிச்சையை செய்து நிறைய புழுக்களை உறிஞ்சி எடுத்து வெளியேற்றினோம். இந்த அறுவைசிகிச்சைக்கு 2 மணி நேரம் பிடித்தது. அதன்பின் ஆகஸ்ட் 27ம் தேதி இரண்டாவது அறுவைசிகிச்சை செய்யப்பட்டு, மேலும் புழுக்கள் அகற்றப்பட்டன. இதன்பின்னும் சில புழுக்கள் மூக்குக்குள் இருந்தன. டர்பன்டைன் ஆயிலை செலுத்தி அந்த புழுக்களை மயங்கச் செய்தோம். இதன் பின் 15க்கும் மேற்பட்ட புழுக்கள் மூக்கின் வழியே ஊர்ந்து வெளியே வந்துவிட்டன. இப்படி எல்லா புழுக்களையும் வெளியேற்றினோம். பதினைந்து நாள் தாமதமாக வந்திருந்தால் அவரது உயிருக்கே ஆபத்தாக முடிந்திருக்கும். இந்த புழுக்கள் இவரது மூளை, கண்கள், தொண்டை, நுரையீரல் ஆகியவற்றை தாக்கவில்லை. அந்த வகையில் இவர் அதிர்ஷ்டம் செய்தவர்தான்.
ஓராண்டுக்கு முன் தேவியின் வலது கன்னத்தில் இருந்த கட்டி அகற்றப்பட்டது. அப்போது ஒன்றிரண்டு புழுக்கள் மூக்கு துவாரத்தின் வழியாகப் போய் உள்ளே தங்கி, முட்டையிட்டு பெருகியிருக்கலாம். இவ்வாறு டாக்டர் சஞ்சீவ் சாவ்லா தெரிவித்தார்.
அறுவைசிகிச்சைக்கு பின் கடந்த மாதம் 30ம் தேதி தேவி டிஸ்சார்ஜ் ஆனார்.
ÔÔமுகத்தின் வலது பக்கத்தில் எனக்கு இருந்த வலியை சொல்லி விவரிக்க முடியாது. மூச்சு விடுவதற்கே சிரமப்பட்டுக் கொண்டிருந்தேன். இப்போது நலமாக இருக்கிறேன்ÕÕ என்று தேவி கூறினார்.