வீட்டு பணியாளர்களுக்கு விரைவில் புதிய சட்டம்

வீட்டுப் பணியாளர்களுக்கான சர்வதேச சட்டத்தை இந்தியாவிலும் அமல்படுத்துவது என்றும், இதுகுறித்த சட்ட வரைவு மசோதாவை எதிர் வரும் குளிர்கால கூட்டத்தொடரில் கொண்டு வருவது என்றும் மத்திய அரசு தீர்மானித்துள்ளது. வீடுகளில் வேலை செய்யும் பணியாளர்களுக்கு போதிய ஊதியம் வழங்கப்படுவதில்லை என்றும், அவர்கள் நடத்தப்படும் விதம் சரிவர இல்லை என்றும் குற்றச்சாட்டுகள் இருந்து வருகின்றன.

உலகிலேயே மிகப்பெரிய எண்ணிக்கையில் தொழிலாளர் சக்தியாக இருப்பவர்கள் இந்த வீட்டுப் பணியாளர்கள் தான். இவர்களது குறைகள் பெரிதும் புறக்கணிக்கப்பட்டு வருவதாக பல ஆண்டுகளாக குரல் இருந்து வருகிறது. போதுமான சம்பளம் வழங்கப்படுவதில்லை என்பது மட்டுமல்லாது, வேலை நேரங்கள், தரமற்ற உணவு, சுகாதாரமற்ற வசிப்பிடம் என நிறைய பிரச்னைகள் இவர்களுக்கு இருந்து வருகின்றன. தவிர, எஜமானர்களால் பல்வேறு வகையில் துன்புறுத்தல்களும் நிகழ்வதாக குற்றச்சாட்டுகள் உள்ளன. குறிப்பாக, பெண் தொழிலாளர்கள் மீது பாலியல் வன்முறை பரவலாக இருப்பதாகவும் குற்றச்சாட்டு உள்ளது. இந்தியாவில் 6.4 மில்லியன் வரை வீட்டுப் பணியாளர்களின் எண்ணிக்கை இருந்து வருகிறது. இந்நிலையில், கடந்த ஜூன் மாதம் ஜெனிவா நகரில், சர்வதேச தொழிலாளர்கள் மாநாடு நடைபெற்றது. இதில், வீட்டுப் பணியாளர்கள் சட்டம் குறித்த தீர்மானம் நிறைவேற்றப்பட்டது. அந்த தீர்மானத்திற்கு இந்தியா ஆதரவும் அளித்தது.

இந்நிலையில், நேற்று பிரதமர் மன்மோகன் சிங் தலைமையில் நடைபெற்ற அமைச்சரவை கூட்டத்தில் ஜெனிவா மாநாடு குறித்தும், அங்கு வீட்டுப் பணியாளர்கள் குறித்து இயற்றப்பட்ட தீர்மானம் குறித்தும் ஆலோசிக்கப்பட்டது. இதையடுத்து, ஜெனிவா மாநாட்டு தீர்மானத்தை ஒட்டி அமையும் வகையில், சர்வதேச அளவில் வீட்டுப் பணியாளர்களுக்கு என சட்டம் உள்ளது போல இந்தியாவிலும் ஒரு புதிய சட்டத்தை கொண்டு வர, அமைச்சரவை ஒப்புதல் அளித்தது. அதன்படி, இதற்கான சட்ட மசோதாவை, எதிர்வரும் குளிர்கால கூட்டத்தொடரின் போது பார்லிமென்டில் கொண்டு வரவும் தீர்மானிக்கப்பட்டுள்ளது.

இச் சட்டத்தினை அமுல்பமுத்தினால் பணியாளர்களுக்கு சந்தோசம் நன்றி பகிர்வுக்கு