துருக்கியில் இடம்பெற்ற பூமி அதிர்ச்சியில் கொல்லப்பட்டோரின் எண்ணிக்கை 366 ஆக அதிகரித்துள்ளது

துருக்கி பூமியதிர்ச்சி

பலியானோர் எண்ணிக்கை 366 ஆக
அதிகரிப்பு; நிவாரண உதவிகளில் தாமதம்


துருக்கியில் இடம்பெற்ற பூமி அதிர்ச்சியில் கொல்லப்பட்டோரின் எண்ணிக்கை 366 ஆக
அதிகரித்துள்ளது. மேலும் 1300க்கும் மேற்பட்டோர் காயமடைந்துள்ளனர்.
கட்டிட இடிபாடுகளுக்குள் சிக்கியோரை மீட்கும் பணிகள் நேற்றைய தினத்திலும் மீட்புக்
குழுவினரால் முன்னெடு க்கப்பட்டது.
இதில் பூமி அதிர்ச்சி இடம்பெற்று 30 மணிநேரம் கழிந்த நிலையில் நேற்று முன்தினம்
ஒருவர் உயிருடன் மீட்கப்பட்டார். எனினும் நேற்று மாலைவரையான 7 மணி நேரத்திற்குள்
எவரும் உயிருடன் மீட்கப்படவில்லை என மீட்புக்குழுவினரை ஆதாரம் காட்டி பி. பி. சி.
செய்தி வெளியிட்டுள்ளது.
துருக்கியில் ஈரான் எல்லையில் உள்ள வான்நகர் பகுதியில் கடந்த ஞாயிற்றுக்கிழமை 7.2
ரிச்டர் அளவில் ஏற்பட்ட கடும் நிலநடுக்கத்தால் அங்குள்ள வான் மற்றும் எர்சிஸ்
நகரங்களும் அதைச்சுற்றிய பகுதிகளும் அடியோடு அழிந்து தரைமட்டமாயின. சுமார் 1000
கட்டிடங்கள் முற்றாக தரைமட்டமாகியுள்ளதாக அனர்த்த முகாமைத்துவ நிர்வாகம்
தெரிவித்துள்ளது.
இந்நிலையில் கட்டிட இடிபாடுகளுக்குள் சிக்கி உயிருடன் இருக்கலாம் என
சந்தேகிக்கப்படுகிறது. எனவே, சாவு எண்ணிக்கை மேலும் அதிகரிக்கலாம் என துருக்கி அரசு
அச்சம் தெரிவித்துள்ளது.
மீட்புப் பணிகளில் 3ஆயிரம் பேர் ஈடுபட்டுள்ளனர். இவர்களுடன் அங்கிருக்கும்
குடியிருப்பாளர்களும் மீட்புப் பணியில் ஈடுபட்டு வருகின்றனர். சிறப்புப் பயிற்சி
பெற்ற 12 மோப்ப நாய்கள், 680 பேர் அடங்கிய மருத்துவர்கள் குழு, 108 அம்புலன்ஸ்
வண்டிகள், 7 ஹெலிகொப்டர்கள் ஈடுபடுத்தப்பட்டுள்ளன.
பூகம்பத்தை தொடர்ந்து வான் மற்றும் எர்சிஸ் நகர பகுதிகளில் 200 தடவைக்கு மேல் நில
அதிர்வுகள் ஏற்பட்டன. இதனால் பீதி அடைந்த மக்கள் வீடுகளில் தங்குவதற்கு
அச்சப்பட்டனர்.
எனினும் பூமியதிர்ச்சியினால் பாதிக்கப்பட்டோருக்கான நிவாரணப் பணிகளில் தாமதம்
ஏற்பட்டுள்ளது. பலரும் உணவின்றி குளிரையும் பொருட்படுத்தாமல் வீதியில் தங்கியுள்ளனர்.
பூமியதிர்ச்சி இடம்பெற்ற பகுதியை சுற்றி 12,000 தற்காலிக முகாம்கள்
அமைக்கப்பட்டுள்ளதாக துருக்கி அரசு கூறியுள்ளது.

:!#: :!#: :’|: சொல்லுவோம் .அமைதி வர வேண்டுவோம்