லாராவை முந்திய காலிஸ்

தென் ஆப்ரிக்கா, ஆஸ்திரேலியா அணிகளுக்கு இடையேயான 2வது டெஸ்ட் ஜோகன்னஸ்பர்க்கில் நேற்று தொடங்கியது. டாஸ் வென்ற தென் ஆப்ரிக்கா அணி முதலில் பேட் செய்தது. கேப்டன் ஸ்மித் சிறப்பான தொடக்கத்தை தரத் தவறினார். 11 ரன்னில் ஜான்சன் பந்தில் ஆட்டமிழந்தார். அடுத்து வந்த அம்லாவும் (19) ஏமாற்றம் அளித்தார். 3வது விக்கெட்டுக்கு வந்த காலிஸ் அதிரடியாக ஆட்டத்தை தொடங்கினார்.


முதல் பந்திலேயே பவுண்டரி அடித்து அசத்திய அவர், 3வது பந்தில் ஒரு ரன் எடுத்தார். இதன் மூலம், டெஸ்ட் போட்டியில் அதிக ரன் எடுத்த வீரர்கள் வரிசையில் வெஸ்ட் இண்டீஸ் வீரர் லாராவை (11,953 ரன்) முந்தி 4வது இடத்துக்கு முன்னேறினார். தொடர்ந்து டெஸ்ட் போட்டியில் 12,000 ரன்களை கடந்த காலிஸ் (54) அரைசதம் அடித்து ஆட்டமிழந்தார்.

தொடக்க ஆட்டக்காரர் ரூடால்ப் 30 ரன்னில் வெளியேறினார். 5வது விக்கெட்டுக்கு ஜோடி சேர்ந்த பிரின்ஸ், டிவில்லியர்ஸ் பொறுப்புடன் ஆடி அரைசதம் அடித்து அணிக்கு நல்ல ஸ்கோரை பெற்று தந்தனர். டிவில்லியர்ஸ் 64, பிரின்ஸ் 50 ரன்னில் ஆட்டமிழந்தனர். 62 ஓவர் முடிவில் தென் ஆப்ரிக்கா 7 விக்கெட் இழப்புக்கு 243 ரன்களுடன் இருந்தது. பவுச்சர் 1 ரன்னுடன் ஆட்டமிழக்காமல் இருந்தார்.

டெஸ்ட் போட்டியில் அதிக ரன் அடித்த முதல் 5 வீரர்கள் பட்டியல்:

வீரர் போட்டி ரன் 100
சச்சின் (இந்தியா) 183 15,086 51
டிராவிட் (இந்தியா) 159 12,979 36
பாண்டிங் (ஆஸி.) 156 12,495 39
காலிஸ் (தெ.ஆ.) 147 12,003 40
லாரா (வெ.இ.) 131 11,953 34