குழந்தைகளின் கவிதை

by **rinos** Fri 25 Nov 2011 - 16:55

கீழாய்ப் பெயர் பொறிக்கப்படும்
வார இதழ்களைத் தேடியபடி
வாய்ப்புகளின் படிக்கட்டில்
முண்டியடிக்கிறது கவிதை,

பள்ளியில் விழுந்த
குண்டொன்றில் கருகிப்
பின் கிழிந்த தாளொன்றின்
பரப்பில் நின்று
நடுங்கியபடி நில்லென்றது
துயரங்களால்
துரத்தி அடிக்கப்பட்ட காற்று,

வறண்ட பேனாவின்
முனைகளில் ஓடி
ஒளிந்தபடி வார்த்தைகளை
வெளி நீட்டிப் பார்க்கிறது
கவிதையின் கண்கள்,

வெடித்த குண்டுகளில்
வெந்து மடியும் முன்
தன் பிஞ்சு விரலொன்றால்
பின்னிழுத்துப் பின்னிழுத்துப்
பாதி வரையுண்ட வண்ணப்
பறவையொன்றின் சிறகில்
வண்ணமற்றுக் கிடக்கிறது
கவிதையின் இலக்கணங்கள்,

குழந்தைகளால் எழுதப்பட்டுப்
போரினால் அழிக்கப்பட்ட
கோடுகளைக் காவலிருப்பதாய்க்
காற்று சொல்லவும்,
வாய்ப்புகளின் படிகளில்
இருந்து குதித்து
விழுந்து அண்டமெங்கும்
வெடித்துச் சிதறி
ஓவென்றழுகிறது கவிதை
. அறிவழகன் நன்றி