பிரதியமைச்சரை மறித்து மக்கள் நிவாரணம் வழங்குமாறு கோரிக்கை

நிவாரணம் வழங்கக்கோரி கிழக்கு பல்கலைக்கழகத்துக்கு விஜயம்செய்திருந்த மீள்குடியேற்ற பிரதியமைச்சரை மறித்து வெள்ளத்தினால் பாதிக்கப்பட்ட மக்கள் கோரிக்கைவிடுத்துள்ளனர்.

இன்று பிற்பகல் வெள்ளத்தினால் கடும் பாதிப்புக்குள்ளாகியுள்ள கிழக்கு பல்கலைக்கழகத்தை பார்வையிட்டபின் திரும்பியபோது பல்கலைக்கழக வாயிலில் கூடிய பொதுமக்கள் தமக்கு நிவாரணம் வழங்க பிரதியமைச்சர் உடனடி நடவடிக்கையெடுக்கவேண்டும் எனவும் கோரிக்கை விடுத்துள்ளனர்.

தாம் வெள்ளத்தில் மிகவும் கடமையாக பாதிக்கப்பட்டுள்ள நிலையில் தமது நிலை தொடர்பில் யாரும் கவனத்தில் கொள்ளவில்லையெனவும் பொதுமக்கள் பிரதியமைச்சரிடம் தெரிவித்தனர்.

செங்கலடி பிரதேச செயலகத்துக்குட்பட்ட கொம்மாதுறை மேற்குவந்தாறுமூலை மேற்கு மற்றும் கிழக்கு ஆகிய பகுதிகளைச்சேர்ந்த மக்களே இவ்வாறு கோரிக்கைவிடுத்துள்ளனர்.

இப்பகுதிகளில் சுமார் 600க்கும் மேற்பட்ட குடும்பங்கள் வாழ்வதாக தெரிவித்த மக்கள் தாம் விவசாயத்தொழிலேயே நம்பியுள்ளதாகவும் எனினும் இதுவரை தமக்கு உண்ண உணவு கூட கிடைக்காத நிலைமையே காணப்படுவதாகவும் தெரிவித்தனர்.

இது தொடர்பில் பதிலளித்த மீள்குடியேற்ற பிரதியமைச்சர் விநாயகமூர்த்தி முரளிதரன்நிவாரணப்பணிகள் துரிதமாக இடம்பெற்றுவருவதாகவும் அனைவருக்கும் நிவாரணம் கிடைக்க வழிசெய்வதாகவும் தெரிவித்தார்.

அத்துடன் செங்கலடி பிரதேச செயலாளருடன் தொடர்புகொண்டு பாதிக்கப்பட்ட மக்களுக்கு உடனடியாக நிவாரணம் வழங்குமாறும் உத்தரவிட்டார்.