மேலும் 6 ஈரான் மாலுமிகள் அமெரிக்க கடற்படையால் மீட்பு

by *சம்ஸ் Thu 12 Jan 2012 - 6:25

கடலில் தத்தளித்த மேலும் 6 ஈரான் மாலுமிகளை அமெரிக்க கடற்படையினர் காப்பற்றியுள்ளனர். கடந்த ஒரு வாரத்திற்குள் ஈரான் மாலுமிகளை அமெரிக்க கடற்படை காப்பற்றிய இரண்டாவது சந்தர்ப்பம் இதுவாகும்.

ஈராக் துறை முகத்தில் இருந்து தென்கிழக்காக 90 மீற்றர் தொலைவில் கடலில் தத்தளித்துக் கொண்டிருந்த 6 ஈரானிய மாலுமிகளையே அமெரிக்க கடற்படையினர் காப்பாற்றியதாக பென்டகன் குறிப்பிட்டுள்ளது.

மேற்படி மாலுமிகள் சென்ற படகு விபத்திற்கு உள்ளாகி மூழ்கியதால் இவர்கள் சிறு படகொன்றில் தப்பியுள்ளனர். இந்நிலையில் இவர்களை மீட்ட அமெரிக்க கடற்படையினர் இவர்களுக்கு மருத்துவ சிகிச்சை வழங்கியதோடு ஹலால் உணவு வழங்கினர்.

பின்னர் இவர்கள் ஈரான் கரையோர பாதுகாப்பு படையினரிடம் கையளிக்கப்பட்டதாக பென்டன் குறிப்பிட்டுள்ளது.

இந்த சம்பவம் தொடர்பில் ஈரான் அரசு எந்த அறிவிப்பும் வெளியிடவில்லை.

இதற்கு முன்னர் கடந்த வியாழக்கிழமை கடற்கொள்ளையர்களிடம் சிக்கிய 13 ஈரான் மாலுமிகளை அமெரிக்க கடற்படை காப்பாற்றியது. அதற்கு ஈரான் அரசு வரவேற்பு தெரிவித்தது.

ஈரான் அணு ஆயுதம் உற்பத்தி செய்வதாக அதன் மீது அமெரிக்கா மேலும் பொருளாதார தடைகளை விதித்தது மற்றும் ஈரான் கடல் எல்லையான ஹொர்முஸ் நீரிணையை மூடுவதாக ஈரான் அரசு எச்சரிக்கை விடுத்தது போன்ற விவகாரங்களால் இரு நாட்டு உறவிலும் மேலும் விரிசல் ஏற்பட்டுள்ள நிலையிலேயே இச்சம்பவங்கள் இடம்பெற்றுள்ளமை குறிப்பிடத்தக்கது.