பங்களாதேஷ் அரசை கவிழ்க்க இராணுவம் சதி: இருவர் கைது

பங்களாதேஷ் அரசை கவிழ்க்க இராணுவம் சதி: இருவர் கைது
பங்களாதேஷின் ஆளும் அரசை கவிழ்க்க முன்னாள் இராணுவத்தினர் உட்பட சிலர் சதித்திட்டம் தீட்டியதை அந்நாட்டு இராணுவம் அம்பலப்படுத்தி உள்ளது. பங்களாதேஷில் பிரதமர் ஷேக் ஹசினா தலைமையிலான அரசு நடக்கிறது. அங்கு அந்த ஆட்சியை கவிழ்க்க சதி நடந்துள்ளது.

இது குறித்து இராணுவ ஜெனரல் முகமது மசூத் ரசாக் நேற்று முன்தினம் நிருபர்களிடம் கூறிய விபரம்: அரசை கவிழ்க்கும் முயற்சியில் முன்னாள் இராணுவ அதிகாரிகளுடன் தற்போது இராணுவத்தில் உள்ள சிலர் ஈடுபட்டுள்ளனர். இது தொடர்பாக முன்னாள் மேஜர் மற்றும் துணை தளபதி 2 பேர் கைது செய்யப்பட்டனர். அவர்களிடம் நடத்திய விசாரணையில் ஆட்சியை கவிழ்க்க சதித்திட்டம் தீட்டியது அம்பலமானது.

மேலும், இதில் தொடர்புள்ள சிலர் தலைமறைவாகியுள்ளனர். முன்னாள் மேஜர் ஜியா மற்றும் சந்தேகிக்கப்படும் தற்போதைய அதிகாரிகள் 16 பேரை இராணுவம் தீவிரமாக கண்காணித்து வருகிறது. இது தொடர்பான விசாரணை முழுமையடையும் பட்சத்தில், குற்றவாளிகள் மீது கடுமையான நடவடிக்கை எடுக்கப்படும். இவ்வாறு அவர் தெரிவித்தார். பங்களாதேஷ் கடந்த 1990 ம் ஆண்டு வரை இராணுவத்தின் கட்டுப்பாட்டில் 15 ஆண்டுகள் இருந்தமை குறிப்பிடத்தக்கது.