லீப் வினாடி’ குறித்து இறுதி முடிவு மூன்று ஆண்டுகளுக்கு ஒத்திவைப்பு

லீப் வினாடி’ குறித்து இறுதி முடிவு மூன்று ஆண்டுகளுக்கு ஒத்திவைப்பு
உலகக் கடிகாரத்தில் மாற்றம் கொண்டு வரும் லீப் வினாடி முறையை தொடர்ந்து தக்கவைப்பது குறித்த தீர்மானத்தை எடுப்பது இன்னும் மூன்று ஆண்டுகளுக்கு ஒத்திவைக்கப்பட்டுள்ளது.

ஜெனீவாவில் நேற்று முன்தினம் கூடிய சர்வதேச தொலைத் தொடர்பு மாநாட்டில் இந்த லீப் வினாடி குறித்து நாடுகளுக்கு இடையில் மாறுபட்ட கருத்து ஏற்பட்டதால் இது தொடர்பில் மேலும் ஆய்வு நடத்த மூன்று ஆண்டு கால அவகாசம் பெறப்பட்டது.

1972 ம் ஆண்டு அறிமுகம் செய்யப் பட்ட லீப் வினாடி முறை, பூமியின் சுழற்சிக்கு அமைய உலகக் கடிகாரத்தை மாற்றி அமைப்பதாகும். சர்வதேச ஆய்வு கூடங்களில் அமைந்துள்ள அணுக்கடி காரங்கள் இந்த கோட்பாட்டுக்கமைய மாற்றப்பட்டு வருகின்றன.

கடல் அலைகள், தட்ப வெப்ப நிலை மாற்றங்கள், புவியியல் நிகழ்வுகள் காரணமாக ஏற்படும் உராய்வினால் பூமி தன்னைத் தானே சுற்றிக் கொள்ளும் வேகம் வேறுபடுகிறது. இதனைக் கணித்து சர்வதேச கடிகாரத்தில் மேலதிகமாக ஒரு வினாடி சேர்க்கப்பட்டு வருகிறது. இவ்வாறு ஒரு நூற்றாண்டில் சர்வதேச கடிகாரத்தில் 18 வினாடி அளவில் மாற்றம் ஏற்படுவதாக கணிக்கப்பட்டுள்ளது.

ஆனால் இந்த லீப் வினாடி முறையை கைவிட வேண்டும் என பல நாடுகளும் கோரி வருகின்றன.

இந்த லீப் வினாடி முறை ஒரு தொந்தரவான செயல் என அமெரிக்கா போன்ற நாடுகள் விமர்சித்து வருகின்றன.

செயற்கைக் கோள்களைச் சார்ந்துள்ள கணனி மென்பொறியியலாளர்களும் அனைத்து தொழில்நுட்பப் பணியாளர் களும் இந்த லீப் வினாடி மாற்றத்தால் சிக்கலை எதிர்நோக்கி வருகின்றனர்.

இதனால் இந்த முறையை கைவிட வேண்டும் என அமெரிக்கா உள்ளிட்ட நாடுகள் சர்வதேச தொலைத் தொடர்பு ஒன்றிய மாநாட்டில் வாதித்தன. இதில் கனடா, ஜப்பான், இத்தாலி, மெக்சிகோ மற்றும் பிரான்ஸ் போன்ற நாடுகள் அமெரிக்காவுக்கு ஆதரவு தெரிவித்தன.

ஆனால் பிரிட்டன் போன்ற நாடுகள் லீப் வினாடி தொடர்ந்தும் கடைப் பிடிக்கப்பட வேண்டும் என வாதிட்டன. பிரிட்டனுக்கு ஜெர்மனி போன்ற நாடுகள் ஆதரவு தெரிவித்தன. லீப் வினாடியை மாற்றினால் எதிர்காலத்தில் பெரும் சிரமத்தை எதிர்நோக்க வேண்டி வரும் என பிரிட்டன் குறிப்பிட்டது.

லீப் வினாடி மாற்றப்படாமல் இருந்தால் எதிர்காலத்தில் பூமி சுழற்சியோடு எமது காலக்கடிகாரம் முரண்பட்டு விடும்.

அதாவது இன்னும் 500 ஆண்டுகளில் பூமி சுழற்சியோடு உலகக் கடிகாரம் ஒரு மணிநேரம் பிந்தி நிற்கும். இதுவே ஆயிரம் ஆண்டுகள் செல்லும் போது சூரிய மறைவின் போது அணுக் கடிகாரங்கள் விடிகாலையாக காட்டும் என பிரிட்டன் தரப்பில் வாதிடப்பட்டது.

இந்நிலையில் இந்த லீப் வினாடி குறித்த இறுதி முடிவு எடுக்க இன்னும் கால அவகாசம் பெறப்பட வேண்டும் என நைஜீரியா, ரஷ்யா மற்றும் துருக்கி ஆகிய நாடுகள் கோரின.

இதற்கமைய இந்த விவகாரம் குறித்து இறுதி முடிவு எடுப்பது மூன்று ஆண்டுகளுக்கு ஒத்திவைக்கப்பட்டது. இதற்கமைய 2015 ம் ஆண்டு நடைபெறவுள்ள சர்வதேச தொலைத் தொடர்பு மாநாட்டில் இது பற்றி இறுதி முடிவு எடுக்கப்படவுள்ளது.

இந்நிலையில் எதிர்வரும் மூன்று ஆண்டுகளுக்கும் லீப் வினாடியில் தொடர்ச்சியான மாற்றம் கொண்டுவரப் படவுள்ளது. அடுத்து எதிர்வரும் ஜூன் 30ம் திகதி உலகக் கடிகாரத்தில் லீப் வினாடியாக ஒரு வினாடி சேர்க்கப் படவுள்ளது.