மகிந்தவின் கருத்துக்கள்தான் ஊடக அடக்கு முறைகளுடன் இராணுவத்தைத் தொடர்புபடுத்தியது!

May 31st, 2012 அன்று பிரசுரிக்கப்பட்டது.


ஊடகவியலாளர்களான கீத் நொயர் மற்றும் நாமல் பெரேரா ஆகியோர் மீது மேற்கொள்ளப்பட்ட தாக்குதலுக்கு இராணுவத்தினர் காரணம் என சுமத்தப்படும் குற்றச்சாட்டு குறித்து சரத் பொன்சேகாவிடம் கேள்வி எழுப்பப்பட்ட போது, யுத்தம் இடம்பெற்ற காலத்தில் ஊடகங்கள் மற்றும் ஊடகவியலாளர்கள் மீது மேற்கொள்ளப்பட்ட அடக்குமுறைகளோடு இராணுவத்தினரை தொடர்புபடுத்தியவர் ஜனாதிபதியேயாவர் என தெவித்துள்ளார்.

பொன்சேகா அளித்த செவ்வியில்,

“கொழும்பு பகுதியில் இடம்பெற்ற சிறுசிறு பெறுமதி அற்ற சட்டவிரோத செயல்களில் தொடர்புற எமக்கு சந்தர்ப்பம் கிடைக்கவில்லை’ எனவும் சரத் பொன்சேகா தெவித்துள்ளார்.

ஊடகவியலாளர் கீத் நொயர் கடத்தி கடுமையாகத் தாக்கப்பட்டு விடுவிக்கப்பட்டதோடு, நாமல் பெரேராவை கடத்த முயற்சிக்கப்பட்டு அது பலனளிக்காததால் அவர் மீது கடும் தாக்குதல் மேற்கொள்ளப்பட்டது.

ஊடகவியலாளர்கள் தாக்கப்படுவதன் பின்னணியில் இராணுவம் இருப்பதாக குற்றச்சாட்டு முன்வைக்கப்பட்டுள்ள நிலையில் இந்த சம்பவத்துடன் இராணுவ புலனாய்வுப் பிரிவினருக்கு தொடர்பு இருப்பதாக எதிர்க்கட்சித் தலைவர் பாராளுமன்றில் தெரிவித்திருந்தார்.

ஆனால் இராணுவத்தினர் மீது இவ்வாறு குற்றச்சாட்டுக்கள் எழுவதற்கு ஜனாதிபதி ஊடக பிரதானிகளைச் சந்தித்து வெளியிட்ட சில கருத்துக்களே காரணமாகும் என முன்னாள் இராணுவத் தளபதி சரத் பொன்சேகா குறிப்பிட்டுள்ளார்.

ஜனாதிபதி, ஊடக பிரதானிகளை அலரி மாளிகைக்கு அழைத்து சில தருணங்களில், நீங்கள் இராணுவத்துடன் மோதி பிரச்சினைகளை ஏற்படுத்திக்கொண்டால் அதனை என்னால் தீர்த்து வைக்க முடியாது என்ற பொறுப்பற்ற கருத்துக்களை ஜனாதிபதி கூறியிருந்தார்.

எனவே அதனால் சிலர் இராணுவத்தினரை நோக்கி விரல் நீட்டினர் என சரத் பொன்சேகா கூறினார்.

அவ்வாறான குற்றச்சாட்டுக்கள் இருந்தால் உரியவர்கள் மீது சட்ட நடவடிக்கை எடுக்க வேண்டியது அரசாங்கத்தின் பொறுப்பு எனவும் அவர் தெரிவித்துள்ளார்.

சனல் 4 தொலைக்காட்சி வெளியிட்ட இராணுவத்தினர் தொடர்பான காணொளி குறித்து கருத்து தெரிவித்த சரத் பொன்சேகா, தான் அவற்றை பார்க்கவில்லை எனவும் அதில் உள்ளடக்கப்பட்டுள்ள குற்றச் சாட்டுக்கள் குறித்து விசாரணை நடத்துவது அரசாங்கத்தின் பொறுப்பு எனவும் குறிப் பிட்டுள்ளார்.

குறிப்பாக கைது செய்யப்பட்ட விடுதலைப் புலி சந்தேக நபர்கள் கைகட்டப்பட்டு சுடப்பட்டமை குறித்து கருத்து வெளியிட்ட சரத் பொன்சேகா, அந்த காட்சி இராணுவ சிப்பாய்கள் மீது புலிகள் மேற்கொள்ளும் துப்பாக்கிச்சூடு என கூறியுள்ளார்.

காரணம் எனது சிப்பாய்கள் நூற்றுக்கு மேற்பட்டோர் காணாமல் போயினர். அவர்களை பிடித்துச் சென்றது தீவிரவாதிகள் தான் என சரத் பொன்சேகா தெரிவித்துள்ளார்.

எனவே இவ்வாறான விடயங்கள் குறித்து சாதாரண விசாரணை நடத்தப்பட வேண்டும். நேரடியாக இராணுவத்தினரை நோக்கி விரல் நீட்டுவது நியாயமானதல்ல எனவும் அவர் சுட்டிக்காட்டியுள்ளார்.