வெயிலின் கொடுமை தாங்கமுடியாமல் 148 இறப்பு!

by **mufees** Mon 4 Jun 2012 - 20:19

June 4th, 2012 அன்று பிரசுரிக்கப்பட்டது.

இந்தியாவில் இவ்வருடம் முந்தைய வருடத்தை விட வெயிலின் தாக்கம் அதிகமாகவே இருக்கிறது. அக்னி வெயில் முடிவடைந்த பின்பும் வெயிலின் கொடுமை இன்னமும் தீர்ந்த பாடில்லை. குறிப்பாக நாட்டில் எங்கும் இல்லாத அளவிற்கு ஆந்திரப் பிரதேசத்தில் மிகவும் கொடூரமாக இருக்கிறது வெயிலின் கொடுமை.

வெயில் ஒரு பக்கம் கொடூரமான அனல்காற்று ஒருபக்கம் என மக்களைப் போட்டு வாட்டி வதைக்கிறது.

மேற்கு கோதாவரி மாவட்டம் காகிநாடா மற்றும் துணியில் நேற்று 116.6 டிகிரி வெயில் கொளுத்தியது. கம்மம் மாவட்டத்தில் 114.8 டிகிரியும், திருப்பதி, நிஜாமா பாத், கர்னூல் ஆகிய 3 நகரங்களில் 111.2 டிகிரியும் வெயில் பதிவாகியிருந்தது.

வெயிலுக்கு நேற்று ஒரே நாளில் மட்டும் 148 பேர் சுருண்டு விழுந்து இறந்தனர்.

கிழக்கு கோதாவரி மாவட்டத்தில் 36 பேரும், விசாகப் பட்டினத்தில் 31 பேரும், மேற்கு கோதா வரியில் 21 பேரும், கம்மம் மாவட்டத்தில் 13 பேரும், கிருஷ்ணா, வாரங்கல் மாவட்டத்தில் தலா 11 பேரும், விஜய நகரத்தில் 9 பேரும், ஸ்ரீகாகுளம், கரீம் நகரில் தலா 6 பேரும், குண்டூரில் 4 பேரும் பலியாகி உள்ளனர்.

நேற்று முன்தினம் ஒரே நாளில் 28 பேர் வெயிலுக்கு பலியானார்கள். நேற்று உயிர் பலி 148 ஆக உயர்ந்தது. 17 ஆண்டுகளுக்கு பிறகு இந்த ஆண்டு வெயிலின் தாக்கம் அதிகமாக இருப்பதாக வானிலை இலாகா அறிவித்துள்ளது.