பலத்த மழை: புதுக்கோட்டை மாவட்ட பள்ளிகளுக்கு விடுமுறை

புதுக்கோட்டை, மார்ச். 6-

இலங்கை அருகே மேற்கு வங்கக்கடலில் உருவான குறைந்த காற்றழுத்த தாழ்வு நிலை தென்மேற்கு வங்கக்கடல் வரை பரவியுள்ளது. இதன் காரணமாக தென் தமிழகம் மற்றும் புதுச்சேரியில் அடுத்த 2 நாட்களுக்கு மழை பெய்யும் என சென்னை வானிலை ஆய்வு மையம் எச்சரித்துள்ளது. மேலும் தமிழகத்தின் கடலோர மாவட்டங்களில் பலத்த மழை பெய்ய வாய்ப்பு உள்ளதாகவும் வானிலை மையம் அறிவித்திருந்தது.

அதன்படி டெல்டா மாவட்டங்களான திருச்சி, தஞ்சை, நாகை, திருவாரூர் மாவட்டங் களில் பரவலாக மழை பெய்து வருகிறது. கடலோர மாவட்டமான புதுக்கோட்டையில் நேற்று காலை முதல் மாலை வரை மழை பெய்துகொண்டே இருந்தது. அதுவே நள்ளிரவில் பலத்த மழையாக கொட்டியது. விடிய, விடிய பெய்த தொடர் மழையால் சாலைகளில் தண்ணீர் பெருக்கெடுத்து ஓடியது.

தாழ்வான பகுதியில் மழைநீர் குளம்போல் தேங்கி நின்றது. வீதிகளில் மக்கள் நடமாட்டம் குறைந்து காணப்பட்டது. கடலோர பகுதிகளான கோட்டைப்பட்டினம், ஜெகதாபட்டினம், மீமிசல், மணல் மேல்குடி ஆகிய இடங்களில் பலத்த காற்றுடன் மழை கொட்டியது. இதனால் பெரும்பாலான விசைப்படகு மற்றும் நாட்டுப்படகு மீனவர்கள் கடலுக்குள் மீன் பிடிக்க செல்லவில்லை.

அச்சத்துடன் கரைபகுதியில் படகுகளை நிறுத்தி வைத்துள்ளனர். விடிய, விடிய பெய்த தொடர்மழை காரணமாக புதுக்கோட்டை மாவட்டத்தில் பள்ளிகளுக்கு மட்டும் இன்று விடுமுறை அறிவித்து கலெக்டர் மனோகரன் உத்தரவிட்டுள்ளார். மழையால் மாவட்டத்தில் அறுவடைக்கு தயார் நிலையில் இருந்த நெற்பயிர்கள் தண்ணீரில் மூழ்கின. இதனால் விவசாயிகள் கவலையடைந்து உள்ளனர்.

திருச்சி மாவட்டத்தில் மணப்பாறை, வையம்பட்டி, லால்குடி, முசிறி, துறையூர் ஆகிய பகுதிகளில் இன்று காலை முதல் லேசான சாரல் மழை பெய்து வருகிறது. வானம் மேகமூட்டத்துடன் இருள் சூழ்ந்து காணப்படுகிறது. காலை 8 மணி வரை வெளிச்சம் குறைவாக இருந்ததால் வாகனங்கள் முகப்பு விளக்குகளை எரிய விட்டபடி சென்றன.