திண்டிவனம் அருகே தண்டவாளத்தில் விரிசல்: தென் மாவட்ட ரெயில்கள் 3 மணி நேரம் தாமதம்

by *சம்ஸ் Thu 14 Mar 2013 - 7:52

சென்னை, மார்ச். 14-

கன்னியாகுமரி, நெல்லை, மதுரை, தென்காசி, ராமேஸ்வரம், தூத்துக்குடி உள்ளிட்ட பல பகுதிகளில் இருந்து சென்னை எழும்பூர் நோக்கி அனைத்து ரெயில்களும் வழக்கம்போல் இன்று வந்து கொண்டிருந்தன.

அதிகாலை 4 மணியளவில் திண்டிவனம்-ஒலக்கூர் இடையே தண்டவாளத்தில் விரிசல் ஏற்பட்டு இருந்ததை ரெயில்வே ஊழியர்கள் கண்டு பிடித்தனர்.

சற்று நேரத்திற்கு முன்பு திருச்சியில் இருந்து வந்த மலைக்கோட்டை எக்ஸ்பிரஸ் அந்த இடத்தை கடந்து சென்றுள்ளது. விரிசல் ஏற்பட்ட பகுதியை அகற்றி விட்டு புதிய தண்டவாளம் அந்த இடத்தில் பொறுத்த வேண்டிய நிலை ஏற்பட்டது. இதனை சரிசெய்யும் பணியில் ஊழியர்கள் ஈடுபட்டனர்.

இதனால் தென் மாவட்டத்தில் இருந்து வந்த எல்லா ரெயில்களும் ஆங்காங்கே நிறுத்தப்பட்டன. பாண்டியன், நெல்லை, முத்துநகர், அனந்தபுரி, கன்னியாகுமரி, பொதிகை, ராமேஸ்வரம், செந்தூர், மன்னார்குடி உள்ளிட்ட அனைத்து ரெயில்களும் வழியில் நிறுத்தப்பட்டன. மாற்றுப் பாதையில் ரெயில்களை இயக்க வேண்டி இருந்ததால் வேகம் குறைக்கப்பட்டது.

இதன் காரணமாக அனைத்து ரெயில்களும் 3 மணி நேரம் தாமதமாக எழும்பூர் வந்து சேர்ந்தன. காலை 5.35 மணிக்கு வந்து சேரவேண்டிய பாண்டியன் எக்ஸ்பிரஸ் 8.40 மணிக்கு வந்தது. அதனை தொடர்ந்து நெல்லை, கன்னியாகுமரி உள்ளிட்ட அனைத்து ரெயில்களும் தாமதமாக வந்து சேர்ந்தன.

தண்டவாளத்தில் ஏற்பட்ட விரிசல் காரணமாக ரெயில்கள் தாமதமாக வந்ததால் பயணிகள் பெரும் சிரமத்திற்கு ஆளானார்கள்.