கலைஞர் டி.வி.க்கு ரூ.200 கோடி கடன் வாங்கியதில் கனிமொழிக்கு தொடர்பில்லை

by *சம்ஸ் Sat 4 May 2013 - 7:57

புதுடெல்லி, மே.4-

சி.பி.ஐ. தொடர்ந்துள்ள 2ஜி ஸ்பெக்ட்ரம் வழக்கில் முன்னாள் மத்திய மந்திரி ஆ.ராசா, கனிமொழி எம்.பி. உட்பட பலர் குற்றம்சாட்டப்பட்டுள்ளனர். இந்த வழக்கு டெல்லியில் உள்ள சி.பி.ஐ. சிறப்பு கோர்ட்டின் நீதிபதி ஓ.பி.சைனி முன்னிலையில் விசாரிக்கப்பட்டு வருகிறது. தற்போது சி.பி.ஐ. தரப்பு சாட்சி விசாரணை நடைபெற்று வருகிறது.

இந்த வழக்கில் நேற்று சாட்சி விசாரணை நடைபெற்ற போது கலைஞர் டி.வி.யின் பொது மேலாளர் (நிதி) ஜி.ராஜேந்திரன் சாட்சி அளித்தார். அவரை கனிமொழி தரப்பில் மூத்த வக்கீல் ராம்ஜெத்மலானி குறுக்கு விசாரணை செய்தார். அப்போது அவர் கூறியதாவது:-

நான் முன்பு சன் டி.வி.யில் பணியாற்றினேன். பின்னர் கலைஞர் டி.வி.யில் சேர்ந்தேன். இந்த வழக்கின் விசாரணை அதிகாரி கடந்த 18.3.11 அன்று எனது வாக்குமூலத்தை பதிவு செய்தார். கலைஞர் டி.வி.யின் முதல் நிர்வாகக் கூட்டம் 6.6.07 அன்று நடத்தப்பட்டது. அந்த கூட்டத்தில் கலைஞர் டி.வி.யின் எதிர்காலம் குறித்து பேசப்படவில்லை.

கலைஞர் டி.வி.யின் இயக்குனர் பதவியில் இருந்து 20.6.07 அன்று கனிமொழி ராஜினாமா செய்தார். எனவே நிர்வாகக் கூட்டத்திலும் அவர் பங்கேற்கவில்லை. கலைஞர் டி.வி.க்கு உரிமம் கேட்டு மத்திய தகவல் தொடர்புத் துறையிடம் விண்ணப்பிக்க வேண்டும் என்ற முடிவு முதன்முதலாக 30.7.07 அன்றய கூட்டத்தில் எடுக்கப்பட்டது.

ஆனால் அதற்கு ஒரு மாதத்துக்கு முன்பே கனிமொழி தனது இயக்குனர் பதவியை ராஜினாமா செய்துவிட்டார். எனவே உரிமம் பெறும் பொறுப்புகளை கனிமொழி பார்த்துக்கொண்டார் என்று குற்றம்சாட்டுவது தவறு.

கலைஞர் டி.வி.க்கு சினியுக் பிலிம்ஸ் நிறுவனத்திடம் இருந்து ரூ.200 கோடி கடன் வாங்க வேண்டும் என்ற முடிவு, 13.2.09 அன்று நடந்த நிர்வாகக் கூட்டத்தில் தான் எடுக்கப்பட்டது. அந்தக் கூட்டத்தில் கனிமொழி கலந்து கொள்ளவில்லை. எனவே அந்த நிறுவனத்திடம் இருந்து கடன் வாங்க வேண்டும் என்ற முடிவில் கனிமொழிக்கு எந்த பங்கும் இல்லை.

கலைஞர் டி.வி.யில் சரத்குமாருக்கு 20 சதவீதமும், தயாளு அம்மாளுக்கு 60 சதவீதமும் பங்கு இருந்தது. சரத்குமாருக்கு தமிழும், தயாளு அம்மாளுக்கு ஆங்கிலமும் தெரியாது. எனவே சிலநேரம் எம்.டி. அமிர்தம் அல்லது ஆடிட்டரிடம் பேசி நிர்வாகத்தை நடத்துவோம்.
இவ்வாறு அவர் சாட்சி அளித்தார்.

மாலைமலர்.