தென் பெண்ணை ஆற்றில் வெள்ளம்: கிராமப் பகுதி மக்களுக்கு எச்சரிக்கை

by *சம்ஸ் Sat 22 Jun 2013 - 7:29

ஓசூர், ஜுன்.22-

கர்நாடகாவில் கடந்த சில வாரங்களுக்கு முன்பு மழை பெய்தது. இதன் காரணமாக ஓசூர் கெலவரப்பள்ளி அணைக்கு நீர்வரத்து அதிகரித்தது. இந்த அணையின் மொத்த கொள்ளளவு 44.28 அடியாகும். அணையின் தற்போதைய நீர் மட்டம் 40 அடியாகும்.

இந்த நிலையில் தற்போது கர்நாடகாவின் நீர்பிடிப்பு பகுதிகளில் கனமழை பெய்து வருகிறது. இதன் காரணமாக கெலவரப்பள்ளி அணைக்கு மீண்டும் நீர்வரத்து அதிகரித்து உள்ளது. நேற்று அணைக்கு வினாடிக்கு 360 கன வீதம் தண்ணீர் வந்தது. இதையடுத்து அணையின் பாதுகாப்பு கருதி அதிக அளவில் தண்ணீர் வெளியேற்றப்படுகிறது.

இதன் காரணமாக ஓசூர் அருகே உள்ள தொரப்பள்ளி அக்ரஹாரம், கோபசந்தரம், சென்னசந்திரம், முத்தாலி, ஆலுர், புக்கசாகரம், பாகலூர், கெலவரப்பள்ளி, மொரனப் பள்ளி பாத்தக்கோட்டா உள்பட 18 கிராமங்களில் தென் பெண்ணை ஆற்றில் தண்ணீர் பெருக்கெடுத்து ஓடுகிறது.

இதனால் ஓசூரை சுற்றி தென் பெண்ணை ஆற்று கரையோரத்தில் உள்ள 18 கிராம மக்களுக்கு வெள்ள அபாய எச்சரிக்கை விடப்பட்டுள்ளது. இது குறித்து அதிகாரிகள் கூறியதாவது:-

கெலவரப்பள்ளி அணைக்கு தண்ணீர்வரத்து அதிகரித்ததன் காரணமாக அதிக அளவில் தண்ணீர் வெளியேற்றப்படுகிறது. கர்நாடகாவில் மழை பெய்வதால் இன்னும் நீர்வரத்து அதிகரிக்கக்கூடும். அவ்வாறு அதிகரித்தால் அணையில் இருந்து அதிக அளவில் தண்ணீர் திறந்து விடவாய்ப்புள்ளது.

எனவே தென் பெண்ணை ஆற்று கரையோர பகுதிகளில் வசிக்கும் மக்கள் எச்சரிக்கையாக இருக்கவும். தரைமட்ட பாலத்தை கடந்து செல்வதை தவிர்க்கவும்.

இவ்வாறு அதிகாரிகள் கூறினர்.