பள்ளிகள் உடைக்கப்படுகிறதா அதற்க்கு ஹக்கீம்தான் காரணம் என்கிறார் ஜனாதிபதி

by **jafuras** Mon 15 Jul 2013 - 18:27

பள்ளிகள் உடைக்கப்படுகிறதா அதற்க்கு ஹக்கீம்தான் காரணம் என்கிறார் ஜனாதிபதி

கண்டி ஜனாதிபதி மாளிகையில் நேற்று சனிக்கிழமை இடம்பெற்ற கிழக்கு மாகாண சபை அதிகார இழுபறி தொடர்பிலான சந்திப்பில் மஹியங்கனை பள்ளிவாசல் தாக்குதல் பற்றி அமைச்சர்களான ரவூப் ஹக்கீம், றிசாத் பதியுதீன், அதாவுல்லா ஆகியோர் ஜனாதிபதி மஹிந்த ராஜபக்ஸவின் கவனத்திற்கு கொண்டு சென்றுள்ளனர்.

இவ்வாறான சம்பவங்களின் போது முஸ்லிம் சமூகமானது ஜனாதிபதி மஹிந்த ராஜபக்ஸ தலைமையிலான அரசாங்கத்தையே குற்றம் சுமத்துவதாகவும், இது போன்ற சம்பவங்களை அரசாங்கம் நினைத்தால் தடுத்து நிறுத்தலாமென்று முஸ்லிம் சமூகம் நம்புவதாகவும் 3 முஸ்லிம் அமைச்சர்களும் ஜனாதிபதியிடம் சுட்டிக்காட்டியுள்ளனர்.

ஓ அப்படியா? இந்த சம்பவம் குறித்து நீங்கள் யாரை சந்தேகப்படுகிறீர்கள் எனஅமைச்சர்களைப் பார்த்து ஜனாதிபதி கேள்வியெழுப்பியுள்ளார்.

இதற்கு முஸ்லிம் அமைச்சர்கள்; பௌத்த கடும்போக்குவாத குழுக்கள் தான் இதற்கு காரணம் என பதில் வழங்கியுள்ளனர்.

இதன்போது சற்று ஆத்திரமுற்ற ஜனாதிபதி; அதற்கு காரணம் ஹக்கீம்தானே என்ற கருத்துப்பட தனது நியாயத்தை வெளியிட்டுள்ளார்.

“கடந்த கிழக்கு மாகாண தேர்தலின்போது பள்ளிவாசல்கள் உடைக்கப்படுவதாக ரவூப் ஹக்கீம் பிரச்சாரம் செய்தார். அப்படிச் பிரச்சாரம் செய்யாதீர்கள் என நான் ரவூப் ஹக்கீமிடம் கூறினேன.

தென்னிலங்கை சிங்கள மக்களிடத்திலும், பௌத்த தேரர்களிடமும் ஹக்கீமின் இந்த பிரச்சாரம் தாக்கத்தை ஏற்படுத்தும் என நான் அப்போதே குறிப்பிட்டேன்” என கூறிய ஜனாதிபதி குறித்த பேச்சை தொடராமல் வேறு ஒரு விடயத்தை போட்டு பள்ளிவாசல் விவகாரத்தை முடிவுக்கு கொண்டு வந்தார்.

அவ்வளவுதான் மூன்று அமைச்சர்களும் அப்படியே கப்சிப் ஆகி விட்டனர்.

ஜனாதிபதி மாளிகையில் அதான், இப்தார், தொழுகை!

இக்கலந்துரையாடல் தொடங்க முன்னர் கண்டி ஜனாதிபதி மாளிகையில் இப்தார் நிகழ்வும் ஏற்பாடு செய்யப்பட்டு ஜனாதிபதியின் பங்கு பற்றுதலுடன் அங்கு இப்தார் நடைபெற்றுள்ளது.

இதன்போது அங்கு அதான் (பாங்கு) சொல்லப்பட்டது மட்டுமல்லாமல் இப்தாரைத் தொடர்ந்து தொழுகையும் நடத்தப்பட்டுள்ளது.

கிழக்கு மாகாண அமைச்சரும் முஸ்லிம் காங்கிரஸ் பிரதித் தலைவருமான ஹாபிஸ் நஸீர் அஹமட் இமாமாக நின்று தொழுகையை நடத்தியுள்ளார்.
- See more at: http://www.importmirror.com