சி.பி.ஐ. இயக்குநரின் பாலியல் பலாத்கார கருத்தால் சர்ச்சை

சி.பி.ஐ. இயக்குநரின் பாலியல் பலாத்கார கருத்தால் சர்ச்சை
விளையாட்டு மற்றும் சூதாட்டத்தை பாலியல் பலாத்காரத்துடன் ஒப்பிட்டு சி.பி.ஐ. இயக்குநர் ரஞ்சித் சின்கா தெரிவித்துள்ள கருத்து பெரும் சர்ச்சையை ஏற்படுத்தி உள்ளது. இது தொடர்பாக மகளிர் அமைப்புக்கள் பலவும் ரஞ்சித் சின்காவிற்கு கடும் எதிர்ப்பு தெரிவித்து வருகின்றன.

இந்திய புலனாய்வுக் குழுவின் உயர்மட்டக் குழு கூட்டம் டில்லியில் நேற்று மாலை நடைபெற்றது. இதில் சி.பி.ஐ. இயக்குநர் ரஞ்சித் சின்கா கலந்து கொண்டு லொட்டரி குறித்து பேசினார். கூட்டத்தில் அவர் பேசியதாவது, சூதாடுவது சட்டபூர்வமானதாக ஆக்கப்பட்டு வருகிறது.

பாலியல் பலாத்காரத்தை நீங்கள் தடுக்காவிட்டால் அதனை நீங்கள் வரவேற்று மகிழ்வதாக தான் அர்த்தம், சூதாட்டங்கள் தடுக்கப்படாவிட்டால் அது அரசிடம் மானியம், சலுகை கேட்கும் அளவிற்கு வளர்ந்து விடும். இவ்வாறு ரஞ்சித் தெரிவித்துள்ளார்.

ரஞ்சித் சின்காவின் இந்த கருத்திற்கு முக்கியஸ்தர்கள் பலரும், மகளிர் அமைப்பினரும் எதிர்ப்பு தெரிவித்துள்ளனர். பயோகன் தலைவர் கிரன் மசும்தர் தனது டுவிட்டர் பகுதியில், சி.பி.ஐ. இயக்குநரின் இந்த கருத்து பொறுப்பற்றதாகவும், அநாகரிகமான முறையிலும் உள்ளதாக தெரிவித்துள்ளார்.

மார்க்சிஸ்ட் கம்யூனிஸ்ட் தலைவர் பிருந்தா காரத் கூறுகையில், சி.பி.ஐ. தலைவர் கூறியுள்ள கருத்துக்கள் முற்றிலும் தவறானது எனவும், இதற்காக அவர் பதவி விலக வேண்டும் எனவும் தெரிவித்துள்ளார். சமூக ஆர்வலர் கிரண் பேடி கூறுகையில், ரஞ்சித் சின்கா இதற்காக பொது மன்னிப்பு கேட்க வேண்டும் என தெரிவித்துள்ளார்.

ரஞ்சித் சின்காவின் இத்தகைய அதிர்ச்சி அளிக்கும் கருத்தை அவரது குடும்பத்தினரும், ஆதரவாளர்களும் ஏற்றுக் கொண்டால் அக்கருத்து சரியானது என நாங்கள் பாராட்டலாம் என பா.ஜ. செய்தி தொடர்பாளர் நிர்மலா சீத்தாராமன் தெரிவித்துள்ளார். பல்வேறு மகளிர் அமைப்புகளின் எதிர்பார்ப்பால் ரஞ்சித் சின்கா தனது கருத்தை திரும்பப் பெறுவதாக தெரிவித்துள்ளார். மேலும் தனது கருத்திற்காக அவர் வருத்தம் தெரிவித்துள்ளார். சர்ச்சைக்குரிய கருத்தை கூறியது தொடர்பாக தேசிய மகளிர் கழகத்தின் சார்பில் ரஞ்சித்திற்கு நோட்டீஸ் அனுப்பட்டுள்ளது.

தினகரன்