ஈராக்கில் சிக்கி தவிக்கும் 44 கேரள நர்ஸ்கள்

திருவனந்தபுரம்: ஈராக்கில் பயங்கரவாதிகளின் ஆதிக்கம் அதிகரித்துள்ள நிலையில், அங்கு பணிபுரியும் கேரளவை சேர்ந்த 44 நர்சுகள் சிக்கி தவிக்கின்றனர். அவர்கள் தாயகம் திரும்ப தேவைப்படும் உதவி குறித்து அரசு தரப்பில் அவர்களுக்கு கடிதம் எழுதப்பட்டுள்ளதாகவும், அவர்களில் பெரும்பாலானோர், தொடர்ந்து ஈராக்கில் தங்கியிருக்கவே விரும்புவதாகவும் மத்திய வெளியுறவுத்துறை அமைச்சக வட்டாரங்கள் தெரிவித்தன.

ஆனால், நர்சுகள் தரப்பிலிருந்து மாநில அரசுக்கு அவசர அழைப்பு வந்ததாகவும், இது தொடர்பாக முதல்வர் உம்மன் சாண்டி, மத்திய வெளியுறவுத்துறை அமைச்சரிடம் பேசியுள்ளதாகவும் கேரள அரசு கூறியுள்ளது.

மாநில அரசை தொடர்பு கொண்ட கேரள நர்சுகள், தாங்கள் தாயகம் திரும்ப விரும்புவதாகவும், இதற்கு அரசின் உதவி தேவைப்படுவதாகவும், ஆனால் மருத்துவமனையிலிருந்து விமான நிலையத்திற்கு எப்படி பத்திரமாக அழைத்து செல்லப்படுவோம் என அச்சம் கொண்டுள்ளதாகவும் கேரள அரசு வட்டாரங்கள் தெரிவித்தன. நர்சுகள் தாயகம் செல்ல தடையில்லை எனவும், ஆனால் அவர்கள் மருத்துவமனையை விட்டு வெளியறிய பின்னர் நாங்கள் பொறுப்பேற்க முடியாது என மருத்துவமனை கூறியுள்ளதாக அரசு ஊழியர்கள் கூறியுள்ளனர்.

ஈராக்கில் 200 இந்தியர்கள் உள்ளதாகவும், இவர்களில் பெரும்பாலானோர் கட்டுமான தொழிலை சேர்ந்தவர்கள் எனவும் கூறப்படுகிறது. ஈராக்கிலிருந்து இந்திய தூதரை திரும்ப பெறும் எண்ணம் ஏதுமில்லை எனவும் மத்திய அரசு கூறியுள்ளதாகவும் தெரிகிறது.

ஈராக்கின் மொசூல், திக்ரித் நகரங்களை பயங்கரவாதிகள் கைப்பற்றியுள்ளனர். தற்போது அவர்கள் பாக்தாத் நகரை நெருங்கியுள்ளனர். இதனையடுத்து ஈராக் செல்ல வேண்டாம் என இந்தியர்களை மத்திய அரசு அறிவுறுத்தியிருந்தது குறிப்பிடத்தக்கது. வன்முறை பாதித்த பகுதிகளில் உள்ள இந்தியர்கள் தூதரகத்தை தொடர்பு கொள்ளவும் மத்திய அரசு அறிவுரை வழங்கியுள்ளது.

இந்நிலையில்,பாக்தாத்தில் உள்ள கேரள மாநிலத்தை சேர்ந்த 44 நர்சுகள் பத்திரமாக உள்ளதாக இந்திய தூதரகம் கூறியுள்ளது. இது தொடர்பாக இந்திய தூதரகம் மேலும் கூறுகையில், பல சாலைகள் பயங்கரவாதிகளின் பிடியில் உள்ளது. எனவே சாலை பயணம் பாதுகாப்பானதல்ல என்பதால், நர்சுகளை மருத்துவமனையிலேயே தங்கியிருக்க அறிவுறுத்தப்பட்டுள்ளது. அவர்கள் இந்தியா திரும்ப வேண்டும் என நாங்கள் அறிவுறுத்தியுள்ளோம். ஈராக்கில் உள்ள இந்திய தூதரகத்தை 24 மணி நேரமும் தொடர்பு கொள்ளலாம். எங்களுக்கு தொலைபேசி அழைப்புகள் வந்த வண்ணம் உள்ளது என கூறியுள்ளது.

ஈராக்கில் சிக்கியிருக்கும் கேரளாவைச் சேர்ந்த செவிலியர்களை உடனடியாக மீட்டு, நாட்டிற்கு கொண்டு வர நடவடிக்கை எடுக்கும்படி, மத்திய வெளியுறவுத்துறை அமைச்சர் சுஷ்மா சுவராஜுக்கு கேரள முதல்வர் உம்மன்சாண்டி கடிதம் எழுதி உள்ளார்.

நன்றி: தினமலர்

ஆமாம்.. )*  #)  #)