இலங்கையின் எரிசக்தி வளர்ச்சிக்கு ஈரான் தொடர்ந்தும் ஒத்துழைப்பு

இலங்கையின் எரிசக்தி வளர்ச்சிக்கு ஈரான் தொடர்ந்தும் ஒத்துழைப்பு
கடல்நீரில் மின் உற்பத்திக்கும்
கடல் நீரை குடிநீராக மாற்றவும் உதவி

கடல்நீரில் மின் உற்பத்தி செய்வதற்கும் குடிநீராக மாற்றியமைப்பதற்கும் இலங்கைக்கு ஆதரவு வழங்க தயாராக இருப்பதாக ஈரானின் எரிசக்தி பிரதியமைச்சர் இஸ்மாயில் மொஹ்சோல் தெரிவித்தார்.

இதேவேளை இலங்கையின் எரிசக்தி வளர்ச்சிக்கு ஈரான் அரசாங்கம் தொடர்ந்து உதவிகளை வழங்குமென்றும் தெரிவித்துள்ளார். ஈரான் நிதி உதவியின் கீழ் நிர்மாணிக்கப்பட்டு வரும் உமா ஓயா திட்டத்தின் வேலைத்திட்டங்களை பார்வையிடுவதற்கு வருகை தந்துள்ள ஈரானின் பிரதி எரிசக்தி அமைச்சர் நேற்று முன்தினம் மின் சக்தி அமைச்சர் பவித்ரா வன்னியாராச்சியை அமைச்சில் சந்தித்த போதே இவ்வாறு தெரிவித்தார்.

தொடர்ந்து கருத்து வெளியிட்ட ஈரானின் பிரதி அமைச்சர் இஸ்மாயில் மொஹ்சோல்,

இலங்கையின் ஆற்றுப்புறங்களை அண்டிய பிரதேசங்களில் மேலும் மின்சார உற்பத்தி நிலையங்களை அமைக்கலாம். அத்துடன் எரிசக்தி துறையில் புதிய நுட்பங்களை பயன்படுத்தி மின்சார உற்பத்தியை மேற்கொள்வதற்கும் ஈரானின் விசேட பயிற்சிகளை வழங்கி இலங்கையின் மின்சக்தி துறையை வளர்ச்சியடையச் செய்வதற்கும் ஈரான் அரசாங்கம் தயார் நிலையில் இருப்பதாகவும் தெரிவித்தார்.

உலக எரிசக்தி அபிவிருத்தியில் 14ஆவது இடத்தில் இருக்கும் ஈரான் மாதாந்தம் 40,000 மெகாவாட் மின்சாரத்தை உற்பத்தி செய்து வருகின்றமை குறிப்பிடத்தக்கது. நீர் மின் உற்பத்தி, காற்று ஆகியவற்றினால் மின்சாரத்தை உற்பத்தி செய்து வரும் ஈரான், இதற்காக புதிய நுட்பங்களை பயன்படுத்தி வருகின்றமை குறிப்பிடத்தக்கது.

தினகரன்