பள்ளியை தரம் உயர்த்தாததால் மக்கள் ஆவேசம்

பல்லடம் : பல்லடம் அருகில் 63 வேலம் பாளையம் நடுநிலைப் பள்ளியை, உயர்நிலைப் பள்ளியாக தரம் உயர்த்த வலியுறுத்தி மக்கள் போராட்டத்தில் ஈடுபட்டனர்; பள்ளி நுழைவாயில் கதவை பூட்டி வைத்ததால் பரபரப்பு ஏற்பட்டது.பல்லடம் ஒன்றியம் 63 வேலம் பாளையத்தில் உள்ள ஊராட்சி ஒன்றிய நடுநிலைப்பள்ளியில் மூணுமடை, 63 வேலம்பாளையம் பகுதியைச் சேர்ந்த 260 மாணவ, மாணவியர் படிக்கின்றனர்.அனைவருக்கும் இடைநிலை கல்வித் திட்டத்தின் கீழ் (ஆர்.எம். எஸ்.ஐ.,) நடுநிலைப்பள்ளியை உயர்நிலைப்பள்ளியாக தரம் உயர்த்த கோரி, கடந்தாண்டு ஊர் பொதுமக்கள் சார்பில், பள்ளிக் கல்விதுறைக்கு ஒரு லட்சம் ரூபாய் செலுத்தப்பட்டுள்ளது.பணம் செலுத்தி ஓராண்டு ஆகியும் பள்ளி தரம் உயர்த்தப்படவில்லை; இதனால் ஆவேசம் அடைந்த பள்ளி மாணவர்கள், பெற்றோர்கள், ஊர்பொதுமக்கள் என 200க்கும் மேற்பட்டோர் நேற்று காலை 9.00 மணிக்கு பள்ளி நுழைவாயில் கதவை பூட்டி வைத்து போராட்டத்தில் ஈடுபட்டனர். மாணவர்களுக்கு ஆதரவாக 63 வேலம்பாளையம் ஊராட்சி தலைவர் முருகசாமி, பள்ளி பெற்றோர் சங்க தலைவர் முத்துசாமி மற்றும் கிராம கல்விக்குழுவினர் போராட்டத்தில் பங்கேற்றனர்.தகவலறிந்த மாவட்ட தொடக்க கல்வி அலுவலர் நடராஜன், பல்லடம் உதவி தொடக்க கல்வி அலுவலர் மயில்சாமி பள்ளி முன்பு தர்ணாவில் ஈடுபட்டு இருந்தவர்களிடம் பேச்சு நடத்தினர்; 63 வேலம்பாளையம் ஊராட்சி ஒன்றிய நடுநிலைப்பள்ளியை உயர்நிலைப்பள்ளியாக தரம் உயர்த்தக் கோரி, கடந்த நான்கு ஆண்டுகளாக போராடி வருகிறோம். பள்ளியை தரம் உயர்த்தாததால் ஆறு கி.மீ., தொலைவிற்கு மேல் உள்ள மங்கலம், இடுவாய், பல்லடம் பகுதிக்கு தான் குழந்தைகளை அனுப்ப வேண்டியுள்ளது. இவ் வாறு செல்வதற்கும் போதிய பஸ்வசதி வேலம்பாளையம் பகுதியில் இருந்து இல்லை, என அதிகாரிகளிடம் பொதுமக்கள் தெரிவித்தனர். தொடர்ந்து கல்வி அதிகாரிகள் பேச்சு நடத்தியதில் சமரசம் அடையாத பொதுமக்கள் போராட்டத்தை கைவிடவில்லை; இதனால், நேற்று மாலை வரை, பள்ளி நுழைவாயில் கதவுகள் திறக்கப்படவில்லை.

:”@: :”@: