கவர்ச்சியை பொருட்டாக நினைக்கவில்லை: சோனியா அகர்வால்

தமிழில் காதல் கொண்டேன் மூலம் கதாநாயகியாக அறிமுகமானவர் சோனியா அகர்வால். 7/G ரெயின்போ காலனி, திருட்டுப் பயலே உள்ளிட்ட படங்களில் நடித்தவர், இயக்குனர் செல்வராகவனை காதலித்து திருமணம் செய்து கொண்டார். பிறகு இருவருக்கும் கருத்து வேறுபாடு ஏற்பட்டதால், விவாகரத்து பெற்று பிரிந்து விட்டனர். விவகாரத்திற்குப் பிறகு மீண்டும் திரையில் நடித்துக் கொண்டிருக்கிறார் சோனியா.

இது குறித்து சோனியா அகர்வால் கூறியதாவது; நான் மீண்டும் நடிக்க ஆரம்பித்துள்ளேன். விவாகரத்து செய்து கொண்டதற்கு பின் எனக்கு நிறைய பட வாய்ப்புகள் வருகின்றன. அப்படி வரும் வாய்ப்புகளில் நல்ல கதையம்சம் உள்ள படங்களை மட்டுமே தேர்வு செய்கிறேன். சினிமாவில் நல்லதொரு இடத்தை பிடிக்க வேண்டும் அதற்காக பொறுமையாகவும் கவனமாகவும் இருந்து எனக்கான கேரக்டர்களை தேர்ந்தெடுக்கிறேன்.

தற்போது இரண்டு புதுப்படங்களில் நடிக்க ஒப்பந்தமாகியுள்ளேன். அப்படங்கள் சிறந்த கதையம்சம் கொண்டவை. கவர்ச்சியை பொருட்டாக நினைக்கவில்லை. கதாநாயகியை முதன்மைபடுத்தும் படமாக இருந்தால் உடனே ஒப்புக் கொள்கிறேன்.

எல்லா கேரக்டர்களிலும் நடித்து பெயர் வாங்க வேண்டும். தற்போது வானம் படத்தில் நடித்துக் கொண்டிருக்கிறேன். இனிமே பாருங்க, எனக்கான இடத்தை தமிழில் பிடிக்காமல் விடமாட்டேன்’’ என்றார்.