காணாமற்போன நான்கு கடற்படையினர் தொடர்பில் இதுவரை தகவல் இல்லை! மர்மம் நீடிக்கிறது

முல்லைத்தீவு கடற்பரப்பில் வைத்து கடந்த மார்ச் மாதம் காணாமற்போன நான்கு கடற்படையினர் தொடர்பில் இதுவரை எதுவித தகவலும் கிடைக்கவில்லை என்று கடற்படை வட்டாரங்கள் தெரிவித்தன.
பிரஸ்தாப கடற்படையினர் காணாமல் போய் நேற்றுடன் 39 நாட்கள் ஆகின்றன. எனினும், அவர்களுக்கு என்ன நடந்தது என்பது இன்னும் மர்மமாகவே உள்ளது.


அத்துடன் கடற்படையையும் இச்சம்பவம் அதிரவைத்துள்ளது. குறித்த சம்பவம் தொடர்பில் துரிதமான விசாரணைகளை மேற்கொள்வதற்கென நியமிக்கப்பட்ட உயர் அதிகாரிகள் உள்ளடங்கிய விசேட குழுவுக்கும் இதுவரை எதுவித தகவலும் கிடைக்கவில்லை எனத் தெரியவருகிறது.

நான்கு கடற்படைச் சிப்பாய்களும் வேறு நாட்டுக்குத் தப்பிச் சென்றுள்ளனரா அல்லது இந்தச் சம்பவம் கடற்படையின் திட்டமிட்ட சதியா என பல தரப்பினரும் கேள்வி எழுப்புகின்றனர். இவர்கள் விபத்தில் சிக்குண்டு இறந்திருந்தால் இவர்களின் சடலங்கள் இலங்கை அல்லது இந்திய கடற்கரையில் ஒதுங்கியிருக்கும். ஆனால், அவர்களின் சடலங்கள் கரை ஒதுங்கவில்லை என இரு நாட்டுக் கடற்படையினரும் தெரிவிக்கின்றனர்.

ஒதுங்கிய சடலங்களும் இந்திய மீனவர்களுடையவை என அடையாளப்படுத்தப்பட்டது. சிலவேளை கடற்கொள்ளையர்கள் இவர்களை கடத்தியிருந்தால் கப்பம் பெறுவதற்காக அவர்கள் தகவல்களை கசிய விட்டிருப்பர். ஆனால், அப்படியான சம்பவம் எதுவும் இடம் பெறவில்லை எனத் தெரியவருகிறது.

எனவே, இந்தச் சம்பவமானது இலங்கை கடற்படையினரை மட்டுமல்ல, ஒட்டு மொத்த இராணுவக் கட்டமைப்பையும் அதிர்ச்சியில் ஆழ்த்தியுள்ளது. திறமையான இராணுவக் கட்டமைப்பு இங்கு உள்ளது என பாதுகாப்புத் தரப்பினர் மார்தட்டும் இந்த வேளையில், இந்தச் சம்பவம் அவர்களுக்கு களங்கத்தை ஏற்படுத்தியுள்ளது என்றும் தெரிவிக்கப்படுகின்றது.

கடந்த மார்ச் மாதம் 29ஆம் திகதி ரோந்து நடவடிக்கையில் ஈடுபட்டுக்கொண்டிருந்த நான்கு கடற்படைச் சிப்பாய்கள் படகுடன் காணாமல் போனமை அறிந்ததே. இதனையடுத்து, இரண்டு நாள்கள் கழிந்த நிலையில் அவர்கள் பயணித்த படகு எவ்வித சேதமுமின்றி வெற்றிலைக்கேணி கடற்பரப்பில் கண்டுபிடிக்கப்பட்டது என்பது குறிப்பிடத்தக்கது.