தமிழகத்தில் மொபைல் போன்களின் விலைகள் உயரும்

by **நேசமுடன் ஹாசிம்** Wed 13 Jul 2011 - 6:31

மொபைல் போன்களுக்கு விதிக்கப்படும் வாட் வரியை 4 சதவீதத்திலிருந்து 14.5 சதவீதமாக உயர்த்தி தமிழக அரசு உத்தரவிட்டுள்ளதைத் தொடர்ந்து, இனி மொபைல் போன்களின் விலை உயரக்கூடும் என்று எதிர் பார்க்கப்படுகிறது.

LCD டிவிகள், டிவிடி, மொபைல் போன்கள், ஐ போன், ஐபோட் உள்ளிட்ட எலக்ட்ரானிக் சாதனங்கள் மற்றும் உதிரி பாகங்களுக்கு விதிக்கப்படும் வாட் வரியை 4 சதவீதத்தில் இருந்து 14.5 சதவீதமாக உயர்த்தி தமிழக அரசு கடந்த திங்கள் கிழமையன்று உத்தரவிட்டது.

அரசின் இந்த முடிவால் கள்ளச் சந்தைக்கு வழி ஏற்பட்டுள்ளதாக மொபைல் போன் விற்பனையாளர்கள் கருத்து தெரிவித்துள்ளனர். மொபைல் போன்களின் சந்தை மதிப்பு சுமார் 2,500 கோடி ரூபாய்கள் இருக்கும் என்று கூறியுள்ள விற்பனையாளர்கள், இதில் சுமார் 20 சதவீதம் வரை கள்ளச் சந்தையாக மாறும் வாய்ப்புள்ளதாகக் கூறியுள்ளனர்.

மாநிலத்திற்கு மாநிலம் வாட் வரியின் விகிதம் மாறுபடுவதால், தமிழகத்தைச் சேர்ந்தவர்கள் வேறு மாநிலங்களில் இந்த மொபைல் போன்களை வாங்கி, கள்ளச் சந்தையில் ஈடுபடக் கூடும் என்றும் அவர்கள் கூறியுள்ளனர்.