பொலிஸ் பொறுப்பதிகாரி உட்பட நால்வருக்கு மரண தண்டனை

அங்குலான இரட்டைக் கொலை வழக்கு:

பொலிஸ் பொறுப்பதிகாரி உட்பட
நால்வருக்கு மரண தண்டனை




எம். எஸ். பாஹிம்

அங்குலான இரட்டைக் கொலை சம்பவத்துடன் தொடர்புடைய அங்குலான முன்னாள் பொலிஸ்
பொறுப்பதிகாரி அடங்கலான நான்கு பொலிஸாருக்கும் கொழும்பு மேல் நீதிமன்றம் நேற்று மரண
தண்டனை வழங்கித் தீர்ப்பளித்தது. இதைவிடவும் நான்கு குற்றவாளிகளுக்கும் தலா 40 வருட
சிறைத் தண்டனையும் தலா ஒரு இலட்சம் ரூபா தண்டமும் விதிக்கப்பட்டது.
இத் தீர்ப்பு ட்ரயல் அட்பார் விசாரணை அடிப்படையில் வழங்கப்பட்டுள்ளது.
2009ஆம் ஆண்டு ஓகஸ்ட் 12ஆம் திகதி அங்குலான பிரதேசத்தைச் சேர்ந்த தனுஷ்க உதயங்க
அபொன்சு (27) மற்றும் தினேஷ் தரங்க பெர்ணாந்து ஆகியோரை கொலை செய்த சம்பவம் தொடர்பாக
வழக்குத் தீர்ப்பு நேற்று அறிவிக்கப்பட்டது. பெருந்திரளானவர்கள் நீதிமன்றத்திற்கு
வருகை தந்திருந்ததோடு குற்றவாளிகள் பொலிஸ் பாதுகாப்புடன் சிறைச்சாலைக்கு எடுத்துச்
செல்லப்பட்டனர்.

மேல் நீதிமன்ற நீதிபதிகளான தீபாலி விஜேசுந்தர, டபிள்யு. ரி. எம்.
பி. வராவெவ மற்றும் குமுதினி விக்ரமசிங்க ஆகியோர் முன்னி லையில் மேற்படி வழக்கு
விசாரிக்கப்பட்டு வந்தது. முன்னாள் பொலிஸ் பொறுப் பதிகாரி விக்கி நியுடன், முன்னாள்
பொலிஸ் கான்ஸ் டபிள்களான இந்திரவங்ச குமாரசிரி, தம்மிக நிஹால் மற்றும் சிவில்
பாதுகாப்பு உத்தியோகஸ்தர் ஜனப்பிரிய சேனாரத்ன ஆகியோருக்கே மரண தண்டனை விதித்து
தீர்ப்பளிக்க ப்பட்டது. இவர்களுக்கு எதிராக கொலைச் சதி, கடத்தல், கொலை ஆகிய
குற்றச்சாட்டு கள் சுமத்தப்பட்டிருந்தன. இவர்களுக்கு எதிரான சகல குற்றச்சாட்டுகளும்
நிரூபிக்கப்பட்டதையடுத்தே இந்த தண்டனை விதிக்கப்பட்டது.
2009 ஓகஸ்ட் 12ஆம் திகதியன்று விசாரணைக்காக அழைத்துச் செல்லப்பட்ட இரு இளைஞர்கள்
காணாமல் போனதால் அங்குலான பகுதியில் பெரும் குழப்பநிலை ஏற்பட்டது. மக்கள்
பொலிஸாருக்கு எதிராக கிளர்த்தெழுந்ததோடு பொலிஸ் மீது தாக்குதல் நடத்தினர். இதன்
பின்னரே கைதான இரு இளைஞர்களும் கொலை செய்யப்பட்டது கண்டுபிடிக்கப் பட்டது.