பாராளுமன்றத்தில் லோக்பால் விவாதம்: அன்னாஹசாரே உண்ணாவிரத போராட்டம் இன்று வாபஸ்?

புதுடெல்லி, ஆக. 26-


ஜன
லோக்பால் மசோதா மத்திய அரசு சம்மதித்ததால் அன்னாஹசாரே தனது உண்ணாவிரத
போராட்டத்தை வாபஸ் பெறுவார் என்று எதிர் பார்க்கப்படுகிறது. ஊழலுக்கு
எதிரான லோக்பால் மசோதா அதிகார வரம்புக்குள் பிரதமர், நீதிபதிகள்
ஆகியோரையும் கொண்டு வர வேண்டும் என்று வலியுறுத்தி சமூக சேவகர் அன்னாஹசாரே,
டெல்லி ராம்லீலா மைதானத்தில் உண்ணாவிரதம் இருந்து வருகிறார்.

இன்று
11-வது நாளாக உண்ணாவிரதம் நீடிக்கிறது. அன்னாஹசாரேவிற்கு ஆதரவாக நாடு
முழுவதும் பல்வேறு தரப்பினரும் உண்ணாவிரதம், பேரணி என்று போராட்டம்
நடத்துகின்றனர். இந்த விவகாரம் பாராளுமன்றத்தை செயல்பட விடாமல்
செய்துள்ளது. இதனால் அரசு தனது பிடிவாதத்தை கைவிட்டு இறங்கி வந்துள்ளது.

நேற்று
அன்னா ஹசாரேவை மத்திய மந்திரி விலாஸ்ராவ் தேஷ்முக் நேரில் சந்தித்து
பேசினார். உண்ணாவிரதத்தை கைவிடுமாறு அவரிடம் கேட்டுக் கொண்டார். அதற்கு
அன்னாஹசாரே தனது ஜன லோக்பால் மசோதாவை பாராளு மன்றத்தில் உடனடியாக விவாதிக்க
வேண்டும் என்று வலியுறுத்தினார். மேலும் லோக்பால் சட்டம் அடிப்படையில்
அனைத்து மாநிலங்களிலும் லோக் ஆயுக்தா என்ற மக்கள் நீதி மன்றத்தை ஏற்படுத்த
வேண்டும்.

லோக்பால் சட்ட வரம்புக்குள் அரசின்
கடைநிலை அதிகாரிகளையும் கொண்டு வர வேண்டும். ஊழல்வாதிகள் என்று
கண்டறியப்பட்ட அதிகாரிகளை ஜெயிலுக்கு அனுப்புவதுடன், அவருடைய
குடும்பத்தாரின் சொத்துக்களையும் பறிமுதல் செய்ய வேண்டும். அரசு
அலுவலகங்களில் அதிகாரிகள் ஒவ்வொரு வேலையையும் செய்து தர காலக்கெடு
நிர்ணயிக்கப்பட வேண்டும். தவறும்பட்சத்தில் அவர்களுக்கு அபராதம்
விதிக்கப்பட வேண்டும் என்ற 3 நிபந்தனைகளையும் தெரிவித்தார்.

இது
தொடர்பாக அன்னா ஹசாரே பிரதமருக்கு எழுதிய கடிதத்தை தேஷ்முக்கிடம்
கொடுத்தார். அதை வாங்கிக் கொண்டு தேஷ்முக் கிளம்பிச் சென்றார். பின்னர்
ஆதரவாளர்கள் மத்தியில் பேசிய அன்னா ஹசாரே, மத்திய அரசுக்கு நான் 3
நிபந்தனைகளை விதித்துள்ளேன். அவற்றை ஏற்பதாக மத்திய அரசு எழுத்து பூர்வமாக
உறுதி அளித்தால் உண்ணாவிரத போராட்டத்தை கைவிடுவேன்.

பாராளுமன்றத்தில்
ஜன லோக்பால் மசோதா நிறைவேற்றப்படும் வரை ராம்லீலா மைதானத்தில் தர்ணா
போராட்டத்தை தொடர்ந்து நடத்துவேன். உண்ணாவிரத காலத்தை நீடிக்க
அனுமதிக்குமாறு கேட்டிருக்கிறோம் என்று கூறினார்.

இதற்கிடையே
பிரதமர் மன்மோகன்சிங்கை சந்தித்த தேஷ்முக், அன்னா ஹசாரேவின் கடிதத்தை
அவரிடம் அளித்தார். மேலும் ஹசாரேவின் கோரிக்கை குறித்து மன்மோகன்சிங் கிடம்
அவர் விளக்கி கூறினார்.

இதை தொடர்ந்து மூத்த
மந்திரிகள் பிரணாப் முகர்ஜி, ஏ.கே.அந்தோணி ஆகியோருடன் மன்மோகன் சிங் ஆலோசனை
நடத்தினார். இதில் அன்னாஹசா ரேவின் லோக்பால் மசோ தாவை இன்று
பாராளுமன்றத்தில் தாக்கல் செய்வது என்று முடிவு செய்யப்பட்டது. 193-வது
விதியின்கீழ் இந்த விவாதம் நடத்தப்படுகிறது. அதன் பிறகு இந்த மசோதா
பாராளுமன்ற நிலைக் குழுவுக்கு அனுப்பி வைக்கப்படும்.

பாராளுமன்றத்தில்
ஹசாரேவின் 3 நிபந்தனைகள் பற்றியும் விவாதிக்கப்படும். ஜன லோக்பால் மசோதாவை
பாராளுமன்றத்தில் விவாதிக்க மத்திய அரசு சம்மதித்துள்ள தகவல் வெளியானதும்,
அன்னா ஹசாரே குழுவினரின் உயர்மட்ட கமிட்டி ராம்லீலா மைதானத்தில் அவசரமாக
கூடியது. அதில் அன்னா ஹசாரே, மூத்த வக்கீல் சாந்திபூஷண், கிரண்பேடி, சமூக
சேவகர் மேதாபட்கர் உள்ளிட்டோர் கலந்து கொண்டனர்.

இந்த
ஆலோசனை கூட்டம் நடந்த அதே சமயத்தில் அன்னாஹசாரே கோரிக்கைப்படி ஜன லோக்பால்
மசோதாவை பாராளுமன்றத்தில் விவாதிப்பது தொடர்பான எழுத்துப்பூர்வ உறுதிமொழி
அடங்கிய கடிதத்தை மத்திய அரசு தயாரித்தது. அந்த உறுதிமொழி கடிதம் தேஷ்முக்
மூலம் ஹசாரேவுக்கு அனுப்பி வைக்கப்பட்டது. அவர் அதை அன்னா ஹசாரேயிடம்
கொடுத்தார்.

தான் கோரியபடி மத்திய அரசு
எழுத்துப்பூர்வ உறுதி மொழி கடிதம் அளித்ததால் அன்னாஹசாரே தனது உண்ணாவிரத
போராட்டத்தை வாபஸ் பெற முடிவு செய்துள்ளார். பாராளுமன்றத்தில் ஜன லோக்பால்
மசோதா எந்த திசையில் கொண்டு செல்லப்படுகிறது என்பதை பார்த்து விட்டு உண்ணா
விரதத்தை கைவிடுவார்.

இதற்கிடையே ஜன் லோக்பால்
மசோதா இன்று பாராளுமன்றத்தில் தாக்கல் செய்யப்பட மாட்டாது என்று பாராளுமன்ற
விவ காரத்துறை மந்திரி பி.கே. பன்சால் தெரிவித்துள்ளார். அவர்
கூறியதாவது:-

ஜன் லோக்பால் மசோதாவை விவாதத்துக்கு
எடுத்துக் கொள்ள வேண்டும் என்று எந்த உறுப்பினரும் இன்று நோட்டீஸ் கொடுக்க
வில்லை. ஏற்கனவே அலுவல் ஆய்வுக்குழுவில் எடுக்கப்பட்ட முடிவுப்படி பல்வேறு
மசோதாக்கள் நிலுவையில் உள்ளன. எனவே இன்று உடனடியாக ஜன் லோக்பால் மசோதா
விவாதத்துக்கு வரும் வாய்ப்பு இல்லை.

தனி நபர்
மசோதாக்கள் நிறைவேற்றப்பட உள்ளது. இதில் பாராளுமன்ற விதிகளை கடைப்படிக்க
வேண்டும். ஜன் லோக்பால் மசோதாவை எப்போது தாக்கல் செய்வது என்பது பற்றி
ஆலோசனை நடத்திய பிறகுதான் முடிவு செய்ய முடியும். அன்னாஹசாரே உடல் நிலை
இதற்கு மேலும் உண்ணாவிரதத்தை ஏற்றுக் கொள்ளும் நிலையில் இல்லை. எனவே அவர்
உண்ணாவிரதத்தை கைவிட வேண்டும். அவருக்கு பிரதமர் வேண்டுகோள்
விடுத்துள்ளார். இதில் பாராளுமன்றமும் தனது வரம்புக் குட்பட்டு செயல்படும்.


இவ்வாறு அவர் கூறினார்.