பாலியல் குற்றச்சாட்டு சுமத்தப்பட்ட இத்தாலி பிரதமர் மீது மற்றுமொரு புகார்

by **நண்பன்** Mon 17 Jan 2011 - 23:14

இத்தாலி பிரதமர் சில்வியோ பெர்லஸ்கோனி (74). இவர் மீது பல பாலியல் குற்றச்சாட்டுக்கள் உள்ளன. இளம் பெண்களுக்கு விருந்து கொடுத்து அவர்களுடன் அவர் உல்லாசமாக இருந்ததாக குற்றச்சாட்டுகள் கூறப்பட்டன. அவற்றையெல்லாம் அவர் மறுத்து வந்தார்.

இந்த நிலையில் தற்போது அவர் மீது விபசார புகார் தெரிவிக்கப்பட்டுள்ளது. மொரோக்கோ நாட்டைச் சேர்ந்தவர் கரிமா எல். மக்ரக் (17). இவர் இத்தாலியில் இரவு விடுதி ஒன்றில் நடன அழகியாக உள்ளார். இவருடன் பெர்லஸ் கோனி பல முறை பாலியல் உறவு கொண்டார் என்ற செய்தி அங்குள்ள பத்திரிகைகளில் வெளியாகி உள்ளது.

வயது குறைந்த பெண்ணுடன் பாலியல் உறவு வைத்து கொண்டதால் அவர் மீது விபசார வழக்கு பதிவு செய்யப்பட்டுள் ளதாகவும் அதில் தெரிவிக்கப்பட்டுள்ளது.

மேலும் இது குறித்து விசாரணை நடத்த உத்தரவிடப்பட்டுள்ளதாகவும் கூறப்பட்டுள்ளது. கடந்த மே மாதம் ஒரு திருட்டு வழக்கில் அப்பெண் கைது செய்யப்பட்டார். அப்போது அவரிடம் பொலிஸார் விசாரணை நடத்தினர். அப்போது இந்த தகவல் வெளியானது. பிரதமர் பெர்லஸ் கோனி தனது வீட்டில் அடிக்கடி இரவு விருந்து நடத்துவது வழக்கம்.

இந்த விருந்தில் கலந்து கொண்ட கரிமாவுடன் அவர் பாலியல் உறவு கொண்டார். இதற்கு தனது அதிகாரத்தை தவறாக பயன்படுத்தி கொண்டார் என்றும் குற்றம் சாட்டப்பட்டுள்ளது. விசாரணையின் முடிவில் தான் அவர் மீதான புகார் உண்மையா? என தெரிய வரும். இந்த விவகாரம் இத்தாலியில் பரபரப்பை ஏற்படுத்தியுள்ளது.