வடக்கு - கிழக்கு இணைப்புப் பற்றி பேசப்படுமானால் அரசிலிருந்து வெளியேறுவேன்- ஹிஸ்புல்லாஹ்

மீண்டும் வடக்கு – கிழக்கு மாகாணங்களின் இணைப்புப் பற்றி அரசாங்கம் பேசுமானால் உடனடியாக அரசாங்கத்தை விட்டு வெளியேற வேண்டி ஏற்படும் என சிறுவர் அபிவிருத்தி மகளிர் விவகார பிரதியமைச்சரும் மட்டக்களப்பு மாவட்ட பாராளுமன்ற உறுப்பினருமான எம்.எல்.ஏ.எம். ஹிஸ்புல்லாஹ் தெரிவித்துள்ளார்.

'சமகால அரசியலும் காத்தான்குடிப் பிரதேசத்தின் அபிவிருத்தியும்' என்ற தலைப்பில் பொது மக்களுக்கு விளக்கமளிக்கும் கூட்டம் காத்தான்குடி ஹிஸ்புல்லாஹ் இஸ்லாமிய கலாசார மண்டபத்தில் காத்தான்குடி நகர சபைத் தவிசாளர் எஸ்.எச்.எம்.அஸ்பர் தலைமையில் நடைபெற்ற போதே பிரதியமைச்சர் இதனைத் தெரிவித்தார்.

"தமிழ்தேசியக் கூட்டமைப்பு பாராளுமன்ற உறுப்பினர்களான மாவை சேனாதிராஜா மற்றும் சுரேஷ் பிரேமச்சந்திரன் ஆகியோர் பாராளுமன்றத்தில் உரையாற்றும்போது இணைந்த வடகிழக்கிலேதான் இனப்பிரச்சினைக்கு தீர்வு எனக் குறிப்பிட்டுள்ளனர். தற்போது வடக்கு கிழக்கு மாகாணங்கள் பிரிக்கப்பட்டிருக்கின்றன. வடக்கு கிழக்கு மாகாணங்கள் இணைந்திருந்த போது கிழக்கு மாகாணத்தில் மூவின மக்களுக்குமிடையில் இரத்த ஆறு ஓடியது.

இன்று இம்மாகாணத்தில் மக்கள் நிம்மதியாக வாழ்ந்து கொண்டிருக்கின்றனர். எப்போது இவ்விரு மாகாணங்களும் பிரிக்கப்பட்டதோ அன்றிலிந்து கிழக்கு மாகாணத்திலுள்ள மூவின மக்களும் நிம்மதியாக- ஒற்றுமையாக வாழ்ந்து கொண்டிருக்கின்றனர். மீண்டும் இம்மாகாணங்களின் ஒற்றுமைகள் சீர்குலைக்கப்பட்டு இரத்த ஆறுகள் ஓட கிழக்கு மாகாண மூவின மக்கள் ஒருபோதும் இடமளிக்க மாட்டோம் என தமிழ்தேசியக் கூட்டமைப்பிற்கும் சர்வதேச சக்திகளுக்கும் ஆணித்தரமாக சொல்லிக் கொள்ள விரும்புகின்றோம்.

இணைந்த வடகிழக்கு தொடர்பான எந்தவொரு பேச்சுவார்த்தையிலும் இந்த அரசாங்கம் கலந்து கொள்ளக் கூடாது. இணைந்த வடகிழக்கு தொடர்பான பேச்சுவார்த்தைகள் இடம்பெறுகின்ற போது அவற்றிற்கு அரசாங்கம் உடன்பட்டால் அந்த அரசாங்கத்தில் ஒரு நிமிடம் கூட நாம் இருப்பதற்கு தயாரில்லை என்பதை இவ்விடத்தில் தெளிவாக கூறிக்கொள்ள விரும்புகின்றோம். இந்த மாகாணத்தில் மூவின மக்களும் ஒற்றுமையாக வாழ்ந்து சிறப்பாக ஆட்சி செய்து இம்மாகாணம் செழிப்பான ஓர் மாகாணமாக மாற்ற சகலரும் பூரண ஒத்துழைப்பு வழங்க வேண்டும" எனவும் பிரதியமைச்சர் ஹிஸ்புல்லாஹ் தெரிவித்தார்.