ஓட்டல்களின் தரத்தை உயர்த்த மத்திய அரசு அதிரடி திட்டம்

by *சம்ஸ் Tue 26 Mar 2013 - 8:25

புதுடெல்லி, மார்ச். 26-

நாடு முழுவதும் ஓட்டல்களில் தரமான உணவு கிடைக்க மத்திய அரசு புதிய அதிரடி திட்டத்தை அமுல்படுத்த முடிவு செய்துள்ளது.

நாடு முழுவதும் உள்ள நட்சத்திர ஓட்டல்கள் முதல் சாலையோர கடை வரை அனைத்து ஓட்டல்களிலும் சுகாதாரம் மற்றும் தரத்தை மேம்படுத்த மத்திய உணவு பாதுகாப்பு மற்றும் தர நிர்ணய அமைப்பு முடிவு செய்துள்ளது. இதற்காக பல்வேறு கட்டுப்பாடுகளை விதிக்க யோசித்து வருகிறது.

தற்போது நாடு முழுவதும் சாலையோரங்களில் அனுமதி இல்லாமல் ஏராளமான ஓட்டல்கள் தொடங்கப்படுகின்றன. இங்கு சுகாதாரமான தரமான வகையில் உணவு வழங்கப்படவில்லை என்றும், பெரிய ஓட்டல்களில்கூட சில சமயம் தரமான உணவு வழங்கப்படவில்லை என்று இந்த அமைப்புக்கு புகார்கள் வந்தது.

அதன்படி இனி ஓட்டல்கள் அனைத்துக்கும் முதல் தரம் என்ற அளவுக்கு தரத்தை உயர்த்த வேண்டும். இதற்காக உணவு தயாரிப்பவர்கள் சுத்தமான முறையில் உடை, கையுறை அணிந்திருக்க வேண்டும். அதேபோல் உணவு பரிமாறுபவர்களும் சுத்தமான உடை, கையுறை அணிய வேண்டும், கையை நன்கு சுத்தமாக கழுவிய பின்புதான் உணவுப் பொருள்களை தொட வேண்டும்.

உணவு தயாரிக்கும் இடம் சுத்தமாக பராமரிக்கப்பட வேண்டும். சாப்பிடும் தட்டுக்கள் உபகரணங்களையும் தரமான வகையில் சுத்தம் செய்ய வேண்டும். இவை பின்பற்றப்படா விட்டால் அந்த ஓட்டல்களுக்கு தரச்சான்று கிடைக்காது.

இந்த தர நிர்ணயம் பெறுவதற்காக நாடு முழுவதும் உள்ள ஓட்டல்கள் அந்தந்த மாநிலங்களில் சம்பந்தப்பட்ட துறையில் பதிவு செய்ய வேண்டும். ஒவ்வொரு நாளும் எத்தனை பேர் ஓட்டலுக்கு சாப்பிட வருகிறார்கள் என்று கணக்கிடப்பட வேண்டும். இதேபோல் சாலையோர ஓட்டல்கள், தெருவில் உணவுப் பொருள்கள் விற்பவர்களும் தரமான உணவு பொருள்களை விற்கவும் வலியுறுத்தப்படுகிறது.

இன்னும் சில மாதங்களில் இந்த வழிமுறைகள் இறுதி வடிவம் பெற்று உத்தரவு பிறப்பிக்கப்படும். வருகிற 2014-ம் ஆண்டு பிப்ரவரி மாதத்துக்குள் ஓட்டல்களை பதிவு செய்ய உத்தரவிடப்படுகிறது. அதற்குள் பதிவு செய்யாத ஓட்டல்களின் அனுமதியை ரத்து செய்யவும் உத்தரவிடப்படும்.

முதலில் இந்த உத்தரவு பெரிய நகரங்களில் அமுலுக்கு வரும். தொடர்ந்து சிறிய நகரங்களில் அமல்படுத்தப்படும். ஓட்டல்களை கவனிக்க சுகாதாரத்துறையுடன் நுகர்வோர் விவகாரத்துறையும் இணைந்து கண்காணிப்பு குழு அழைக்கப்படும்.

இதில் தனியார் நிறுவனங்கள் மற்றும் தன்னார்வ தொண்டர்கள் இடம் பெறுவார்கள். அவர்கள் தரமான சுகாதாரமான உணவு தயாரித்து வழங்குவது குறித்து ஆலோசனை வழங்குவார்கள்.