பூக்களை பாடுகிறேன்.

by **ROZHAN A.JIFFRY** Tue 23 Jul 2013 - 13:12

பூக்களை பாடுகிறேன்.

ரோஷான் ஏ.ஜிப்ரி-

விருட்சங்களின் விபரங்களை
விதைகளுக்குப் பின்
இந்த பூக்கள் தான் புதுப்பிக்கின்றன

விடியலின் விலாசங்களை
இதழ்களில் எழுதிய படி
மரம்,செடி,கொடியென
தன்னை அறிமுகம் செய்த வேர்களை
அர்ச்சனை செய்து வணங்கும்
பூ வம்ச புத்திரிகள்
சூரிய கண்ணாடியில்
அழகை அலங்கரிக்கும்
சொப்பன சுந்தரிகள்
வண்டுகளால் வஞ்சிக்கப்பட்டதுமே
உதிர்ந்தே உயிர் நீர்க்கும்-இவைகள்
பரத்தைகள் அல்ல..., பத்தினிகள்...!

பூக்கள் பூப்படைவதனால் தான்
தாவர தாய்களுக்கு
காய்கள் என்னும் சேய்கள் பெற
கருத்தரிக்கின்றன

மாலைகள் மரியாதைக்குரியதாய்
மாற்றப்படுவது
பூக்களை கௌரவிக்க வேண்டும் என்ற
காரணம் தான்

பூக்கள் இல்லையேல்
வாசம் என்னும் வசந்தத்தை நாம்
வாசித்திருப்போமா?
அல்லது...,
தேன் என்ற திரவியத்தை
உலகம் உணர்ந்திருக்குமா??

பூக்கள் இயற்கைக்காய்
இறைவன் செய்த
வாசம் கலந்த வளை காப்பு
மனிதனே இனியாகிலும்
புன்னகைத் தவம் செய்யும்
பூக்களை வாசி
புனிதம் கலைந்ததும் உயிர்விடும்
பூக்களை நேசி
எந்த கால நிலைக்கும் ஏற்றபடி
ஈடு கொடுத்து
புலர்வு கண்டவுடன்
சிரிக்கும் பூக்கள் பற்றி கொஞ்சம்
செலவு செய்
இனியேனும் பூக்களை பார்த்தாகிலும்
உன்னை புதுப்பிக்கப் பார்!

ரோஷான் ஏ.ஜிப்ரி