ஐசிசியின் புதிய விதிக்கு கவாஸ்கர் கடும் கண்டனம்

துடுப்பாட்டத்தின் போது காயமடைந்த வீரர்கள், ரன்னர் வைத்துக் கொள்ளக்கூடாது என்ற ஐ.சி.சி. யின் புதிய விதிக்கு, இந்திய கிரிக்கட் ஜாம்பவான் கவாஸ்கர் கண்டனம் தெரிவித்துள்ளார்.
சர்வதேச கிரிக்கட் கவுன்சிலின் (ஐ.சி.சி.) செயற்குழு கூட்டம் ஹாங்காங்கில் நடக்கிறது. இதில் பல்வேறு புதிய முடிவுகள் எடுக்கப்பட்டு வருகின்றன. இதன் படி, துடுப்பாட்டத்தின் போது காயமடையும் வீரர்கள், இனிமேல் ரன்னர்களை பயன்படுத்த அனுமதி இல்லை என தெரிவிக்கப்பட்டுள்ளது. இதற்கு கவாஸ்கர் கடும் எதிர்ப்பு தெரிவித்துள்ளார்.

இதுகுறித்து கவாஸ்கர் கூறியது, துடுப்பாட்டம் செய்யும் அணிக்கு இதுபோன்ற கடுமையான விதிகளை வழங்கும் போது, களத்தடுப்பு செய்யும் அணிக்கும், விதிகள் கண்டிப்பாக இருக்க வேண்டும். ஒரு ஓவர் பந்துவீச்சு செய்தவுடன், அந்த வீரர் எல்லைக் கோட்டுக்கு அருகே வந்து விடுவார். அடுத்த ஓவர் முடிவதற்குள், தேவையான குளிர்பானங்கள் எடுத்துக் கொண்டு புத்துணர்ச்சி பெற்று, மீண்டும் பந்து வீச தயாராகிவிடுவார்.

தற்போது துடுப்பாட்ட வீரர்களுக்கு ரன்னர்கள் மறுக்கப்படும் போது, பந்துவீச்சாளர்கள் இதுபோன்ற குளிர்பானம் எடுத்துக் கொள்ளவும் அனுமதிக்கக்கூடாது. வழக்கமான ஒருமணி நேரத்துக்கு ஒருமுறை வழங்கப்படும் இடைவெளியே போதுமானது.

இதேபோல, களத்தடுப்பு செய்யும் வீரருக்கு தசைப் பிடிப்பு அல்லது காயம் காரணமாக களத்தை விட்டு வெளியேறினால், அவருக்கு மாற்று வீரரை அனுமதிக்கக்கூடாது. இல்லையெனில் அந்த வீரர் தொடர்ந்து களத்தில், களத்தடுப்பு செய்து கொள்ளட்டும். இதுதான் ரன்னர் பிரச்சினைக்கு சரியான தீர்வு. ஏனெனில் ரன்னர் வைக்கக்கூடாது என்றால், களத்தடுப்பு செய்யும் அணிக்கு சாதகமாகி விடும் என்று கவாஸ்கர் தெரிவித்தார்.

பகிர்வுக்கு நன்றி அண்ணா.