டக்ளசை கைது செய்ய முடியாது - அமைச்சருக்கான சட்டப் பாதுகாப்பு இருப்பதாக கூறுகிறது இந்திய அரசு

by **நேசமுடன் ஹாசிம்** Wed 6 Jul 2011 - 7:38

சிறிலங்காவில் உள்ள அமைச்சர் டகளஸ் தேவானந்தாவை கைது செய்து இந்திய நீதிமன்றத்தில் நிறுத்த முடியாது என்று இந்திய மத்திய அரசாங்கம் கூறியுள்ளது.

சென்னை சூளைமேட்டில் 1986ம் ஆண்டு இடம்பெற்ற கொலை ஒன்று தொடர்பான வழக்கிலேயே இந்திய மத்திய அரசு இவ்வாறு தெரிவித்துள்ளது.

இந்தச் சம்பவத்தில் திருநாவுக்கரசு என்பவர் டகள்ஸ் தேவானந்தாவினால் சுட்டுக்கொல்லப்பட்டிருந்தார்.

இந்த வழக்கில் தேடப்படும் குற்றவாளியாக அறிவிக்கப்பட்டுள்ள டக்ளஸ் தேவானந்தாவை கைது செய்து இந்தியாவுக்கு கொண்டு வரவேண்டும் என்று கோரும் பொதுநல மனு மீதான விசாரணை நேற்று இடம்பெற்றது.

இதன்போது, மேலதிக அரசதரப்பு தலைமை சட்டவாளர் ரவீந்திரன், சிறிலங்கா அமைச்சர் டக்ளஸ் தேவானந்தாவுக்கு ஒரு நாட்டின் அமைச்சர் என்ற வகையில் இராஜாங்க சட்டப் பாதுகாப்பு இருப்பதாகத் தெரிவித்துள்ளார்.

பொதுநல மனு தாக்கல் செய்திருக்கும் தமிழக மக்கள் உரிமைக் கழகத்தின் சார்பில் வாதிட்ட சட்டவாளர், இராதாகிருஷ்ணன் இரு நாடுகளுக்கிடையே குற்றவாளிகளை நாடு கடத்தும் உடன்பாடு நடைமுறையில் இருந்தும், தேடப்படும் குற்றவாளி என்று அறிவிக்கப்பட்ட டக்ளஸ் தேவானந்தாவை கைது செய்ய முயற்சி மேற்கொள்ளப்படவில்லை.

அவர் இந்தியா வந்து போயிருக்கிறார். இந்தியப் பிரதமரையும் சந்தித்துள்ளார். இந்திய அரசு சட்டத்தை நடைமுறைப்படுத்த அக்கறை காண்பிக்கவில்லை என்று குற்றம்சாட்டியுள்ளார்.

தேடப்படுவோரை ஒரு நாட்டிலிருந்து இன்னொரு நாட்டுக்கு அனுப்பி வைப்பது குறித்த உடன்பாடு சிறிலங்கா செய்து கொள்ளப்பட்ட போதிலும், அது டக்ளஸ் தேவானந்தாவைக் கட்டுப்படுத்தாது என்றும், அவர் சிறிலங்காவின் அமைச்சர் என்றும் மத்திய அரசு சட்டவாளர் கூறியுள்ளார்.