அமெரிக்க கடன் நெருக்கடி உலக பொருளாதாரத்தை பாதிக்கும்

அமெரிக்க கடன் நெருக்கடி உலக பொருளாதாரத்தை பாதிக்கும்
ஐ. எம். எப். தலைவர் எச்சரிக்கை
அமெரிக்காவின் கடன் நெருக்கடியைத் தீர்க்க விரைவில் ஒரு முடிவு எடுக்காவிட்டால், உலகப் பொருளாதாரம் பெரிதும் பாதிக்கப்படும் என சர்வதேச நாணய நிதியத்தின் (ஐ.எம்.எப்.) தலைவர் கிறிஸ்டின் லேகார்ட் எச்சரிக்கை விடுத்துள்ளார்.

அமெரிக்கா தன் கடன் உச்ச வரம்பான 14.3 டிரில்லியன் டொலரை, கடந்த மே மாதம் எட்டிவிட்ட நிலையில், கடன் நெருக்கடியைத்தீர்ப்பதற்கான முயற்சிகள் ஆளும் மற்றும் எதிர்க்கட்சித்தரப்பில் மேற்கொள்ளப்பட்டன.

அமெரிக்க நிதியமைச்சகம், ஆகஸ்ட் 2ம் திகதிக்குள் இப்பிரச்சினையைத் தீர்க்காவிட்டால் அரசு அன்றாடச் செலவுகளுக்கே திண்டாட வேண்டி வரும். அரசின் கடன் பத்திரங்களுக்கான வட்டி விகிதம் உயர்ந்து விடுமென எச்ச ரிக்கை விடுத்திருந்த போதும் கூட, நேற்று வரை அதில் எந்த முடிவும் எட்டப்படவில்லை. இந்நிலையில், கடந்த 25ம் திகதி ஜனாதிபதி பராக் ஒபாமாவும், எதிர்க்கட்சித் தலைவரும் பிரதிநிதிகள் சபை சபாநாயகருமான ஜோன் பொய்னரும், தற்போதைய இழுபறிக்கு காரணம் யார் என்பது குறித்து பரஸ்பரம் குற்றம் சாட்டிக் கொண்டனர்.

இதற்கிடையில் ஆகஸ்ட் 2ம் திகதிக்கு இன்னும் நான்கு நாட்களே இருப்பதால் அமெரிக்காவிலும், உலகளவிலும் முதலீட்டாளர்களிடையே பதற்றம் அதிகரித்து வருகிறது.

இது குறித்து நியூயோர்க்கில் பேசிய ஐ. எம். எப். தலைவர் கிறிஸ்டி னலேகார்ட், ஐரோப்பிய பிரச்சினையில் அப்பகுதி தலைவர்கள் காட்டிய ஒற்றுமை மற்றும் துணிவை, அமெரிக்கத் தலைவர்கள் இப்போது இப்பிரச்சினையில் காட்ட வேண்டும். அமெரிக்க கடன் நெருக்கடி மிக மிக கவலை தரத்தக்கது. ஏனெனில் அது அமெரிக்காவை மட்டுமல்லாமல் உலக பொருளாதாரத்தையும் பாதிக்கும் என்றார்.

இதை உறுதிப்படுத்தும் விதத்தில் பிறநாட்டு நாணயங்களுக்கு எதிரான டொலரின் மதிப்பு நேற்று குறைந்து காணப்பட்டது. அதே நேரம் கடன் மதிப்பீட்டு நிறுவனங்களான ஸ்டாண்டர்டு, அன் பவர் மற்றும் மூடிஸ் ஆகியவை பிரச்சினை விரைவில் தீர்க்கப்படாவிட்டால் அமெரிக்காவின் ‘ஏஏஏ’ என்ற குறியீடு குறைக்கப்படும் என மீண்டும் எச்சரித்துள்ளன.

:,;: :,;: