சிரியா மீது அழுத்தம் கொடுக்குமாறு நட்பு நாடுகளுக்கு அமெரிக்கா வலியுறுத்தல்

by **நண்பன்** Mon 15 Aug 2011 - 9:46

சிரியா மீது நிதி மற்றும் அரசியல் நெருக்குதலைத் தர வேண்டும் என்று தனது நட்பு
நாடுகளை அமெரிக்கா வலியுறுத்தியுள்ளது. தனது ‘சொந்த மக்கள் மீது கொடூரமான முறையில்
தாக்குதல் நடத்தும் சிரியா அரசின் போக்கை உடனடியாக நிறுத்த வேண்டுமெனில் இத்தகைய
நெருக்குதல் மிகவும் அவசியம் என்று அமெரிக்க இராஜாங்க செயலாளர் ஹிலாரி கிளிண்டன்
கூறினார்.
அந்நாட்டில் மக்களாட்சி மலர்வதற்கு உரிய நடவடிக்கைகளை அரசு உடனடியாக எடுக்க வேண்டும்.
இதற்கு சர்வதேச நாடுகள் நெருக்கடி தர வேண்டும். சிரியாவுக்கு அளித்து வரும் நிதி
உதவி, பொருளாதார உதவி ஏற்றுமதி உள்ளிட்டவற்றை நிறுத்துவதன் மூலம் சிரியாவுக்கு
நிர்ப்பந்தம் ஏற்படுத்த முடியும் என்று அவர் குறிப்பிட்டார்.
நோர்வேயின் வெளியுறவு அமைச்சர் ஜோன்ஸ் கா ஸ்டோபொ வொஷிங்டனில் அமெரிக்க இராஜாங்க
செயலாளருடன் பேச்சு நடத்திய போது அவர் இந்த கருத்தையும் வலியுறுத்தினார். இருவரும்
பின்னர் கூட்டாக செய்தியாளர்களுக்குப் பேட்டியளித்தனர்.
சிரியா அரசில் உள்ள எதிர்க் கட்சி உறுப்பினர்களுடன் பேச்சு நடத்துவதற்கான பணிகள்
மேற்கொள்ளப்பட்டு வருகின்றன. ஒருங்கிணைந்த செயல் திடத்தை உருவாக்குமாறு அவர்களுக்கு
அறிவுறுத்தப்பட்டுள்ளது
ஜனநாயக ரீதியிலான அரசு அமைவதற்கான வாய்ப்புகள் பிரகாச மடைந்துள்ளன. இதற்கான
நடவடிக்கைகள் தொடர்ந்து மேற்கொள்ளப்படுகின்றன. இந்த நடவடிக்கைகள் மிகச் சிறந்த பலனை
அளிக்கும் என்ற நம்பிக்கை உள்ளதாகவும் அவர் கூறினார்.
ஆஸாத்தின் ஆட்சிக்கு சர்வதேச அளவில் எதிர்ப்பு கிளம்பியுள்ளது. இருப்பினும்
சிரியாவிலிருந்து எண்ணெய், எரிவாயு பெறும் நாடுகள் தொடர்ந்து அந்நாட்டுக்கு
ஆயுதங்களை விநியோகம் செய்து வருகின்றன. இது நிறுத்தப்பட வேண்டும். அப்போதுதான் ஆஸாத்
அரசுக்கு முடிவு கட்ட முடியும். மக்களின் நம்பிக்கையை ஆஸாத் இழந்துவிட்டார்.
எனவே, அவர் ஆட்சியிலிருந்து வெளியேறினால்தான் சிரியா நிலைமை மேம்படும் என்று ஹிலாரி
குறிப்பிட்டார்.