குடந்தை பரஸ்பர சகாய நிதி மகாசபை கூட்டம் :அ.தி.மு.க.,வினர் கைப்பற்ற முயற்சி; பரபரப்பு

கும்பகோணம்: கும்பகோணம் பரஸ்பர சகாய நிதி நிறுவனத்தில் இன்று பங்குதாரர்கள் பங்கேற்கும் ஆண்டு மகாசபை கூட்டம் நடைபெறவுள்ளது. இதில், பிரச்னை ஏற்படாமல் இருக்க 500 போலீஸார் குவிக்கப்பட்டுள்ளனர்.
நூற்றாண்டை கடந்து, கும்பகோணத்தை தலைமையிடமாகக் கொண்டு இயங்கி வரும் பரஸ்பர சகாய நிதி நிறுவனம் தமிழகம் முழுவதும் 90 கிளைகளுடன் செயல்பட்டு வருகிறது. இதில், 750 ஊழியர்கள் பணியாற்றி வருகின்றனர். தொடர்ந்து லாபகரமாக இயங்கி வரும் இந்நிறுவனத்தில் நகை கடன் மட்டுமே வழங்கப்பட்டு வருகிறது. நிறுவனத்தில் 24 கோடி முக மதிப்பிலான 9 லட்சம் பேர் பங்குதாரர்களாக உள்ளனர். பங்குதாரர்கள் பங்கேற்கும் மகாசபை கூட்டம் ஆண்டுதோறும் நடத்தப்படுவது வழக்கம். இந்த மகாசபை கூட்டத்தில் இயக்குநர்கள் தேர்வு, சுழற்சிமுறையில் தேர்வு, ஓய்வு, பங்குதாரர்களுக்கு பங்கு ஈவுத்தொகை, லாப நட்ட கணக்கு உள்ளிட்டவைகள் குறித்து விவாதிக்கப்படும். கடந்த 2006ல் தி.மு.க., ஆட்சி பொறுப்பேற்றவுடன், அ.தி.மு.க., நகர செயலாளர் சேகரிடமிருந்த பொறுப்புகளை தி.மு.க.,வினர் கைப்பற்றி, இந்நிறுவனத்தின் தலைவராக சாக்கோட்டை அன்பழகனும், துணைத் தலைவராக திருவிடைமருதூர் முன்னாள் எம்.எல்.ஏ., ராமலிங்கமும், மேலாண் இயக்குநராக கல்யாணசுந்தரமும், இயக்குநர்களாக பிரகாசகம், இளங்கோவன், ராமன், சந்தானகிருஷ்ணன், துரைராஜ் ஆகியோர் நிர்வாகத்தை திறம்பட நடத்தி வருகின்றனர். இந்நிலையில், இந்நிதி நிறுவனத்தின் 107வது ஆண்டு மகாசபைக் கூட்டம் இன்று காலை 10 மணிக்கு கும்பகோணம் ஜனரஞ்சனி சபாவில் நடக்கிறது. தற்போது ஆட்சி மாற்றம் ஏற்பட்டுள்ளதால், அ.தி.மு.க.,வினர் சேகர் தலைமையில், போலீஸாரின் உதவியுடன் நிதி நிறுவனத்தை கைப்பற்றும் முயற்சியில் தீவிரமாக உள்ளனர். இதற்காக நேற்று காலை முதல் நிதி நிறுவனம் முழுவதும் 50 போலீஸார் குவிக்கப்பட்டு, பங்குதாரர்களாக உள்ள தி.மு.க.,வினரை உள்ளே அனுமதிக்கவில்லை. ஆனால், பங்குதாரர்களாக இல்லாத அ.தி.மு.க.,வினர் தங்கு தடையின்றி உள்ளே சென்று வந்தனர். நிதி நிறுவனத்தின் தலைவர் அன்பழகன், மேலாண் இயக்குநர் கல்யாணசுந்தரம், மற்றும் துணைத் தலைவர் ராமலிங்கம் உள்ளிட்ட இயக்குநர்களை மகாசபை கூட்டத்தில் பங்கேற்க முடியாதவாறு அ.தி.மு.க.,வினர் கொடுத்த புகாரின் பேரில் போலீஸார் வழக்குப்பதிவு செய்து அவர்களை தேடி வருகின்றனர். இதனால், இந்த மகாசபை கூட்டம் நிதி நிறுவனத்தின் தற்போதைய தலைவர், மற்றும் இயக்குநர்கள் பங்கேற்க முடியாத வகையில் நடைபெறும் சூழல் ஏற்பட்டுள்ளது. இதனால், பிரச்னை ஏற்படாமல் இருக்க தஞ்சை சரக டி.ஐ.ஜி., ரவிக்குமார் மேற்பார்வையில், எஸ்.பி., அனில்குமார் கிரி தலைமையில், 4 டி.எஸ்.பி.,க்கள், 10 இன்ஸ்பெக்டர்கள், 50 எஸ்.ஐ.,க்கள் என 500 போலீஸார் கும்பகோணத்தில் குவிக்கப்பட்டுள்ளனர். இதனால் கும்பகோணத்தில் பெரும் பரபரப்பு ஏற்பட்டுள்ளது.