மூன்று பெண்மணிகளுக்கு சமாதானத்துக்கான நோபல் பரிசு

லைபீரிய ஜனாதிபதி உட்பட மூன்று பெண்மணிகளுக்கு 2011 ஆம் ஆண்டின் சமாதானத்துக்கான நோபல் பரிசு அறிவிக்கப்பட்டுள்ளது. லைபீரியன் ஜனாதிபதி எலன் ஜொன்சன் சேர்லீப், லைபீரிய சமாதான செயற்பாட்டாளர் லெய்மா ஜிபெளவீ மற்றும் யெமனைச் சேர்ந்த சமாதான செயற்பாட்டாளர் தவாக்குல் கர்மன் ஆகிய மூவரின் பெயர்களை நோபல் குழு அறிவித்துள்ளது.

பெண்களின் உரிமைகள், பெண்களின் பாதுகாப்பு மற்றும் சமாதானத்தைக் கட்டியெழுப்பும் பணிகளில் முன்நின்றி செயற்பட்ட மனித உரிமை செயற்பாட்டாளர் களுக்கே சமாதானத்துக்கான நோபல் பரிசு வழங்கப்படவிருப்பதாக நோபல் குழு அறிவித்துள்ளது.

லைபீரியா மற்றும் யெமன் ஆகிய நாடுகளில் இடம்பெற்ற மனித உரிமை மீறல்கள் மற்றும் வன்முறைகளை முடிவுக்குக் கொண்டுவர இவர்கள் பாடுபட்டவர்கள் என நோபல் குழு தெரிவித்துள்ளது.

2006 ஆம் ஆண்டு லைபீரியாவின் ஜனாதிபதியாகப் பொறுப்பேற்றுக்கொண்ட எலன் ஜொன்சன் சேர்லீப், அங்கு இடம்பெற்ற மோதல்களை முடிவுக்குக் கொண்டவர மிகவும் அரும்பாடு பட்டவர்.

நோபல் பரிசுக்கு அறிவிக்கப்பட்டிருக்கும் மற்றுமொரு நபர், அதேநாட்டைச் சேர்ந்த சமாதான ஆர்வலரும், மனித உரிமைகள் செயற்பாட்டாளருமான லெய்மா ஜிபெளவீ அமைதிக்கான இயக்கத்தை ஆரம்பித்து லைபீரியாவின் 2-வது சிவில் யுத்தத்தை 2003 ஆம் ஆண்டு முடிவுக்குக்கொண்டுவந்தார். தேர்தல்களில் பெண்களின் பங்களிப்புக்கு இவர் உறுதி ஏற்படுத்திக்கொடுத்திருந்தார்.

மூன்றாவது நபர் யெமனில் ஜனநாயகம், சமாதானம் மற்றும் பெண்களின் உரிமைகளை நிலைநாட்டுவதற்காக நடத்தப்பட்ட போராட்டங்களில் முக்கிய பங்காற்றிய மனித உரிமைகள் ஆர்வலரான தவாக்குல் கர்மன் ஆவார்.