தந்தை செல்வா சிலை உடைப்பு திட்டமிட்ட சதி : யோகேஸ்வரன் கண்டனம்(பட இணைப்பு) _

யுத்த காலத்திலும் உடைக்கப்படாத தந்தை செல்வாவின் சிலை தற்போது தமிழ் மக்களின் பிரச்சினைகள், சர்வதேச மட்டத்தில் எடுத்துச் செல்லப்படும் செயற்பாட்டை விரும்பாத விஷமிகளால் உடைக்கப்பட்டிருப்பது ஒரு திட்டமிட்ட சதியாகும். இச்சிலை மக்கள் எவ்வேளையிலும் நடமாடும் பகுதியில் அமைந்துள்ளதால் இது திட்டமிட்டே உடைக்கப்பட்டுள்ளது என மட்டக்களப்பு மாவட்ட தமிழ் தேசிய கூட்டமைப்பின் நாடாளுமன்ற உறுப்பினரும், இலங்கை தமிழரசுக் கட்சி பிரதிநிதியுமான சீனித்தம்பி யோகேஸ்வரன் தெரிவித்துள்ளார்.

தமிழ் மக்களின் விடுதலைக்காக அயராது பாடுபட்டவரும், என்றும் தனது உடல், உயிர் யாவற்றையும் தமிழுக்காக அர்ப்பணித்து இறைபதம் அடைந்த ஈழத் தமிழ் மக்களின் ஆரம்ப தலைவரான தந்தை செல்வாவின் நினைவாக திருமலை மாவட்டத்தில் தாபிக்கப்பட்டிருந்த அவரின் உருவச் சிலையை கடந்த சில தினங்களுக்கு முன் உடைத்துள்ள கயவர்களைத் தான் வன்மையாகக் கண்டிப்பதாக யோகேஸ்வரன் எம்.பி விடுத்துள்ள கண்டன அறிக்கையில் குறிப்பிடப்பட்டுள்ளது. அதில் மேலும் குறிப்பிடப்பட்டுள்ளதாவது,

"தந்தை செல்வாவின் உருவச் சிலையை உடைப்பதன் மூலம் தமிழ் மக்களின் தமிழ் உணர்வை அழித்து விடலாம் என எண்ண வேண்டாம். இச்செயற்பாடுகள் மேலும் எங்கள் மக்களின் தமிழ் தேசிய உணர்வையும், விடுதலை நோக்கையும் தூண்டிவிடுமே அன்றி அடக்கி விடமாட்டாது. தந்தை செல்வாவின் சிலையை உடைக்கலாம். அவர் எமது மக்களின் மனங்களில் விதைத்துள்ள தமிழ் மக்களின் விடுதலை நோக்கை உடைக்க முடியாது.

அத்தோடு இச்சிலையை உடைத்தவர்களைக் கண்டு பிடித்து நடவடிக்கை எடுக்க வேண்டிய பொறுப்பு பாதுகாப்பு தரப்பினரையே சாரும். ஏனெனில் இது ஒரு முக்கிய பிரதான வீதியில் அமைந்துள்ளது. இந்தச் சிலை தற்போது உடைக்கப்பட்டாலும் இந்த இடத்தில் மிகவும் பிரமாண்டமாக ஒரு உருவச் சிலையைத் தமிழ்த் தேசியக் கூட்டமைப்பு விரைவில் நிர்மாணிக்கும்" இவ்வாறு அதில் தெரிவிக்கப்பட்டுள்ளது.