அரபு லீக் பார்வையாளர்களை அனுமதிக்க சிரியா இணக்கம்

அரபு லீக் பார்வையாளர்களை அனுமதிக்க சிரியா இணக்கம்
தலைநகர் மீது கிளர்ச்சியாளர்கள் தாக்குதல்
அரபு லீக் பார்வையாளர்களை நாட்டுக்குள் அனுமதிப்பதை கொள்கையளவில் ஏற்பதாக சிரியா அறிவித்துள்ளது.

தனது உள்நாட்டுப் பிரச்சினைகளில் வெளிநாடுகளின் தலையீட்டை விரும்பாத சிரியாவின் போக்கில் இத்தகைய மாற்றம் ஏற்படக் காரணம், சர்வதேச அளவில் தனக்கு ஏற்பட்டுள்ள நெருக்கடிகளைத் தவிர்ப்பதற்காகத்தான் என்கின்றனர் அரசியல் நோக்கர்கள். மேலும் இது ஒரு கண்துடைப்பு நடவடிக்கை என்றும் அவர்கள் விமர்சித்துள்ளனர்.

கடந்த மார்ச் மாதத்திலிருந்து தொடர்ந்து நடைபெற்று வரும் அரசுக்கு எதிரான போராட்டத்தில் 3500 க்கும் மேற்பட்டோர் கொல்லப்பட்டுள்ளதாக ஐ. நா. தகவல்கள் தெரிவிக்கின்றன.

இதையடுத்து சர்வதேச அளவில் சிரியாவுக்கு நெருக்கடிகள் எழுந்தன. சிரியாவின் உள்நாட்டு பிரச்சினை குறித்து ஆராய அரசியல் பார்வையாளர்களை அனுப்ப அரபு லீக் முடிவு செய்தது. இது குறித்து சாதகமான முடிவை தெரிவிக்க சிரியாவுக்கு விதித்திருந்த நாள் கெடு கடந்த சனிக்கிழமை முடிவடைந்தது.

மேலும் அரசியல் பார்வையாளர்களை அனுமதிக்காவிட்டால் பொருளாதாரத் தடைகளைச் சந்திக்க நேரிடும் என்றும் எச்சரித்தது அரபு லீக். இதையடுத்தே பார்வையாளர்களை அனுமதிக்க சிரியா ஒப்புக் கொண்டுள்ளது.

இதற்கிடையே சிரியாவின் பிரச்சினை குறித்து அந்நாட்டின் எதிர்க்கட்சிகளுடன் விவாதிக்க இங்கிலாந்தும் தனது வெளியுறவுத்துறையின் மூத்த அதிகாரி ஒருவரை நியமித்துள்ளது.

பிரான்ஸின் வெளியுறவுத்துறை அமைச்சர் அலெயன் ஜுபேவும், சிரியா மீதான நடவடிக்கைகளைக் கடுமையாக்கும்படி ஐ. நா. பாதுகாப்புச் சபையை வலியுறுத்தியுள்ளார். ஆனால் இந் நடவடிக்கைக்கு ரஷ்யா அதிருப்தி தெரிவித்துள்ளது. அந்நாட்டுக்கு "வீட்டோ" அதிகாரம் உள்ளது என்பது குறிப்பிடத்தக்கது.

இதேவேளை சிரிய இராணுவத்தில் இருந்து பிரிந்த சுயாதீன படை, தலைநகர் டமஸ்கஸில் உள்ள ஆளும் பாத் கட்சி அலுவலகம் மீது நேற்று தாக்குதல் நடத்தியுள்ளது. டமஸ்கஸ்ஸின் மஸ்ரா பகுதியில் உள்ள இந்த கட்டிடம் மீது தொடர்ச்சியான எறிகணை மற்றும் கிரனைட் தாக்குதல்கள் நடத்தப்பட்டுள்ளன.

இதனைத் தொடர்ந்து அந்த பகுதியில் புகை மண்டலம் வெளியானதாக அங்கிருந்து வரும் செய்திகள் தெரிவிக்கின்றன. சிரியாவில் அரசுக்கு எதிரான ஆர்ப்பாட்டம் ஆரம்பித்தது தொடக்க தலைநகர் மீது கிளர்ச்சிப்படை நேரடி தாக்குதல் நடத்திய முதல் சந்தர்ப்பம் இதுவென்பது குறிப்பிடத்தக்கது.

சிரிய இராணுவத்தில் இருந்து பிரிந்து எதிர்ப்பாளர்களுடன் இணைந்து செயற்படும் சுயாதீனப் படை அண்டிய நாடான துருக்கியை தலைமையகமாகக் கொண்டு தாக்குதல்களை முன்னெடுத்துவருகிறது.

இதனிடையே வெளிநாட்டு அழுத்தங்களுக்கு அடிபணியப்போவதில்லை என சிரிய ஜனாதிபதி பஷர் அல் அசாத் லண்டனில் இருந்து வெளியாகும் "சன்டே டைம்ஸ்" பத்திரிகைக்கு அளித்த போட்டியில் குறிப்பிட்டுள்ளார்.

எனினும் சிரியாவில் வரும் பெப்ரவரி அல்லது மார்ச்சில் பொதுத் தேர்தல் நடத்தப்பட்டு அரசியல் சட்டம் மாற்றப்படும் என உறுதி அளித்துள்ளார். இதன் மூலம் சிரியாவின் புதிய ஜனாதிபதி தேர்வு செய்யப்படுவார். புதிய அரசியல் சீர்திருத்தத் தின்படி நாட்டில் ஜனாதிபதி வாக்குப் பெட்டிகள் மூலம் தீர்மானிக்கப்படும் என அந்த பேட்டியில் குறிப்பிட்டார்.