தென்கிழக்குக் கடலில் தாழமுக்கம்; நாடெங்கும் மழை

வடக்கு, கிழக்கில் வெள்ளம்; குளங்களின் வான் கதவுகள் திறப்பு; கிளிநொச்சியில் கடும் பாதிப்பு
லக்ஷ்மி பரசுராமன்
வடக்கு, கிழக்கு உட்பட நாட்டின் பல பகுதிகளில் கடந்த சில தினங்களாக பெய்து வரும் அடை மழை காரணமாக பெரும்பாலான பகுதிகள் வெள்ளத்தில் மூழ்கியிருப்பதனால் மக்களின் இயல்பு நிலை பாதிக்கப்பட்டு வீடுகளுக்குள் முடங்கிக் கிடக்கும் நிலை ஏற்பட்டுள்ளது.

இதேவேளை கடலில் தாழமுக்கம் உருவெடுத்திருப்பதுடன் இது இலங்கைக்கு தென்கிழக்கு திசையில் வங்காளவிரிகுடாவில் நிலைகொண்டிருப்பதால் வடக்கு, கிழக்கில் தொடர்ச்சியாக கடும் மழையை எதிர்பார்க்க முடியுமெனவும் வானிலை அவதான நிலையத்தின் அதிகாரியொருவர் தெரிவித்தார். வடக்கில் மன்னார், யாழ்ப்பாணம், முல்லைத்தீவு, கிளிநொச்சி ஆகிய மாவட்டங் களிலும் கிழக்கில் நிந்தவூர், தம்பலகாமம், மூதூர், தோப்பூர், திருமலை பிரதான வீதிகள் மற்றும் குறுக்கு வீதிகள் ஆகியனவும் கடும் மழையினால் நீரில் மூழ்கியுள்ளன.

இவற்றைத் தவிர பொலன்னறுவை, அநுராதபுரம், மாத்தளை, கொழும்பு ஆகிய பகுதிகளைச் சேர்ந்த பல குடும்பங்களும் மழை வெள்ளம் காரணமாக இடம்பெயர்ந்துள்ளன.

கடந்த சில தினங்களாக தொடர்ச்சியாக பெய்த அடை மழை காரணமாக நேற்று வரையில் 9,540 குடும்பங்களைச் சேர்ந்த 35 ஆயிரத்து 833 பேர் பாதிக்கப்பட்டிருப்பதாக அனர்த்த முகாமைத்துவ நிலையம் தெரிவித்தது. மழை வெள்ளத்தில் பாதிக்கப்பட்டுள்ளவர்களின் 738 குடும்பங்களைச் சேர்ந்த 2 ஆயிரத்து 759 பேர் இடம்பெயர்ந்து 25 தற்காலிக முகாம்களில் தங்க வைக்கப்பட்டிருப்பதாகவும் அனர்த்த முகாமைத்துவ நிலையத்தின் பேச்சாளர் பிரதீப் கொடிப்பிலி தெரிவித்தார்.

கிளிநொச்சி மாவட்டத்தில் மாத்திரம் 21 தற்காலிக முகாம்களில் 679 குடும்பங்களைச் சேர்ந்த 2 ஆயிரத்து 520 பேர் தங்கவைக்கப்பட்டுள்ளனர். கண்டாவளை, கராச்சி, பச்சிலைப்பள்ளி, பூநகரி ஆகிய இடங்களே நீரில் மூழ்கிக் காணப்படுவதுடன் பாதிக்கப்பட்டவர்களுக்கும் இடம்பெயர்ந்தவர்களுக்கும் கிளிநொச்சி அரச அதிபர் அலுவலகத்தினால் சமைத்த உணவுகள் வழங்கப்பட்டு வருவதாகவும் அரசாங்க அதிபர் திருமதி கேதீஸ்வரன் கூறினார்.

முல்லைத்தீவு மாவட்டத்தில் 3 ஆயிரத்து 975 குடும்பங்களைச் சேர்ந்த 15 ஆயிரத்து 994 பேர் மழை வெள்ளத்தினால் பாதிக்கப்பட்டுள்ளனர். இவர்களுள் 17 குடும்பங்களைச் சேர்ந்த 65 பேர் தற்காலிக இடைத்தங்கல் முகாமில் தங்க வைக்கப்பட்டிருப்பதாகவும் கொடிப்பிலி கூறினார்.

மரியம்பற்று, புதுக்குடியிருப்பு, ஒட்டுச்சுட்டான், துணுக்காய் ஆகிய இடங்கள் வெள்ளத்தில் மூழ்கியுள்ளதுடன் கடந்த திங்கட்கிழமை ஒருவர் நீரில் மூழ்கி உயிரிழந்தமை குறிப்பிடத்தக்கது.

யாழ்ப்பாணத்தில் 3 ஆயிரத்து 511 குடும்பங்களைச் சேர்ந்த 11 ஆயிரத்து 454 பேர் வெள்ளத்தினால் பாதிப்படைந்துள்ளனர். இவர்களில் 11 குடும்பங்களைச் சேர்ந்த 43 பேர் வெற்றியைக் கேணியில் அமைந்துள்ள பரமேஸ்வரா பாடசாலையில் தங்க வைக்கப் பட்டுள்ளனர்.

இவர்களுக்கான சமைத்த உணவுகள் வழங்கப்பட்டு வருகின்றனர். மருதங்கேணி, காரைநகர், நல்லூர், வேலணை ஆகிய பகுதிகளும் நீரில் மூழ்கியுள்ளன.

கொழும்பு இரத்மலாணை பிரதேசங்களில் இரண்டு குடும்பத்தைச் சேர்ந்த ஐவர் கடுங்காற்றினால் பாதிப்படைந்துள்ளனர் எனவும் கொடிப்பிலி தெரிவித்தார்.

நுவரெலியாவில் மழை பெய்து வரும் அதேவேளை பனி மூட்டம் அதிகரித்தும் காணப்படுகிறது.

அத்துடன் தற்போது வங்காள விரிகுடாவில் உருவாகியிருக்கும் தாழமுக்கத்தினால் வடக்கு, கிழக்கைத் தவிர்ந்த வடமத்திய, ஊவா, தென் மற்றும் மத்திய மாகாணங்களில் சுமார் 100 மில்லி மீற்றருக்கு அதிக மழை வீழ்ச்சி பெய்யக் கூடுமெனவும் வானிலை அவதான நிலையம் அறிவுறுத்தியுள்ளது.

கடலில் அனைத்து திசைகளிலும் மழை பெய்யக் கூடும் என்பதுடன் தென்கடலில் வடமேற்காகவும் தென்மேற்காகவும் மணித்தியாலத்திற்கு சுமார் 40-50 கிலோமீற்றர் வேகத்தில் வீசக்கூடிய காற்று மணித்தியாலயத்திற்கு 60 தொடக்கம் 70 வரை அதிகரிக்க முடியுமென்பதினால் கடற்படை வீரர்களும், மீனவர்களும் அவதானத்துடன் செயற்பட வேண்டுமெனவும் அவதான நிலையம் கேட்டுக் கொண்டுள்ளது.

கிழக்கில் பாதிப்பு

சாய்ந்தமருது குறூப், புதிய காத்தான்குடி தினகரன், பட்டிப்பளை, கல்முனை மத்திய குறூப், மணல் சேனை ஓட்டமாவடி தினகரன், அம்பாறை தினகரன் நிருபர்கள்

கிழக்கு மாகாணத்தில் கடந்த மூன்று தினங்களாக பெய்து வரும் அடைமழை காரணமாக இயல்பு வாழ்க்கை பாதிக்கப்பட்டுள்ளதுடன் மக்கள் வீடுகளுக்கு ள்ளேயே முடங்கிக் கிடக்கின்றனர்.

மட்டக்களப்பு, அம்பாறை, திருகோணமலை மாவட்டங்களில் தொடர்ச்சியாக பெய்து வரும் மழையினால் ஆறு, குளங்கள் என்பன மழை நீரினால் நிரம்பி வழிகின்றன. தாழ் நிலப் பிரதேசங்கள் யாவும் வெள்ளத்தினால் சூழப்பட்டுள்ளன. வீதிகளிலும் வெள்ள நீர் தேங்கி நிற்கின்றது.

மழை காரணமாக உணவுப் பண்டங்களுக்கு தட்டுப்பாடு ஏற்பட்டுள்ளது. குறிப்பாக கடலுணவு, மரக்கறி என்பனவற்றிற்கு தட்டுப்பாடு ஏற்பட்டுள்ளது. விலைகளும் அதிகரித்துள்ளன.

மழை நீரினால் வயல் நிலங்கள் வெள்ளக் காடாக காட்சியளிக்கின்றன. தாழ் நில பிரதேசங்களில் உள்ள மக்கள் மேட்டு நிலப் பிரதேசத்தை நோக்கி நகர்கின்றனர்.

இடைக்கிடையே கடும் காற்றும் வீசுகிறது. கடல் கொந்தளிப்பாக காணப்படுகிறது.

மட்டு. மாவட்டம்
பட்டிப்பளை நிருபர்

மட்டக்களப்பு மாவட்டத்தில் தொடர்ச்சியாக மழை பெய்து வருவதன் காரணமாக வெள்ளப் பெருக்கு ஏற்பட்டுள்ளது.

நேற்று காலை 8.30 மணி தொடக்கம் இன்று காலை 5.30 வரையான 21 மணி நேரத்தில் 51.7 மி.மீ மழை பெய்துள்ளதாக மாவட்ட வானிலை அவதான நிலைய கடமை நேர அதிகாரி எஸ். ரமேஸ் தெரிவித்தார்.

இவ்வருடம் இன்று காலை 5.30 வரை 3370.5 மில்லிமீற்றர் மழை பெய்துள்ளதாகவும், இது வருடாந்த மட்டக்களப்பு மாவட்ட மழை வீழ்ச்சியின் இரு மடங்கை விட அதிகம் எனவும் சுட்டிக்காட்டினார்.

பெருவெள்ளம்
புதிய காத்தான்குடி தினகரன் நிருபர்

மட்டக்களப்பு மாவட்டத்தில் வாழைக்சேனை, செங்கலடி, ஓட்டமாவடி, காத்தான்குடி, ஏறாவூர், வவுணதீவு, வெள்ளாவெளி ஆகிய பிரதேச செயலாளர் பிரிவுகளில் வெள்ளம் ஏற்பட்டுள்ளது.

பலரின் வீடுகளுக்குள் வெள்ளம் ஏறியதால் உறவினர் நண்பர்கள் வீடுகளுக்கு இடம்பெயர்ந்துள்ளதுடன் சிலர் தமது வீடுகளுக்குள் உயரமான கட்டில்கள், பலகைகளை போட்டு இருந்து வருகின்றனர்.

காத்தான்குடி பிரதேச செயலர் பிரிவில் புதிய காத்தான்குடி, விளையாட்டு மைதான வீதி தாறுஸ்ஸலாம் பகுதி, தோனாவை அண்மித்த பிரதேசம், நூரானிய்யா மாவத்தை என்பன வெள்ளத்தினால் மூழ்கியுள்ளன.

மட்டக்களப்பு மாவட்டத்தில் வியாழக்கிழமை காலை 8.30 மணி தொடக்கம் வெள்ளிக்கிழமை காலை வரை 82.2 மில்லிமீற்றர் மழை பெய்துள்ளதாக மட்டக்களப்பு மாவட்ட வானிலை அவதான நிலைய பொறுப்பாளர் சிவதாஸ் தெரிவித்தார்.

மட்டக்களப்பு மாவட்டத்திலுள்ள பிரதேச செயலகங்கள் தோறும் வெள்ளத்தினால் இடம்பெயர்ந்தவர்களின் விபரங்கள் மாவட்ட அனர்த்த முகாமைத்துவ நிலையத்தினால் கோரப்பட்டுள்ளன.

வான் கதவுகள் திறப்பு
புதிய காத்தான்குடி தினகரன் நிருபர்

கிழக்கில் பெய்து வரும் மழையினால் கிழக்கிலுள்ள குளங்களின் வான்கதவுகள் திறக்கப்பட்டுள்ளன.

நேற்று (வெள்ளிக்கிழமை) இக்குளங்களின் வான் கதவுகள் திறக்கப்பட்டுள்ளன.

மட்டக்களப்பு மாவட்டத்திலுள்ள உன்னிச்சைக்குளத்தின் மூன்று வான் கதவுகள் திறந்து விடப்பட்டு நான்கு அடி நீர் திறந்து விடப்பட்டுள்ளது.

உறுகாம குளத்தின் 2 வான்கதவுகள் திறக்கப்பட்டு 2 அடி தண்ணீர் திறந்துவிடப்பட்டுள்ளது.

அதேபோன்று வாகனேரிக்குளம், வடமுனை வெலிக்கா கண்டி குளங்களின் வான்கதவுகளும் திறக்கப்பட்டு நீர்திறந்து விடப்பட்டுள்ளது.

மட்டக்களப்பு மாவட்டத்தில் குளங்களின் நிலைமை நீர்ப்பாசன அதிகாரிகளினால் அவதானிக்கப்பட்டு வருகின்றன.

அம்பாறை மாவட்டம்

கல்முனை மத்திய குறூப் நிருபர், மணல்சேனை நிருபர்கள்

அம்பாறை மாவட்டத்தின் பல்வேறு பிரதேசங்களிலும் கடந்த மூன்று தினங்களாக பெய்து வரும் கனமழை காரணமாக தாழ் நிலப் பிரதேசங்கள் வெள்ளத்தில் மூழ்கியுள்ளன.

இம்முறை அம்பாறை மாவட்டத்தில் பெரும் போகத்தில் செய்கை பண்ணப்பட்ட பல்லாயிரக்கணக்கான ஏக்கர் வேளாண்மைப் பயிர்களும் வெள்ளத்தில் மூழ்கும் அபாயத்தை எதிர்கொண்டுள்ளன.

வீதிகளில் வெள்ள நீர்வழிந்தோடுவதால் பாதசாரிகள் பயணிப்பதில் பல்வேறு அசெளகரியங்களை அனுபவிக்கின்றன.

தொடர்ச்சியாக மழை பெய்து கொண்டிருப்பதனால் மரக்கறிவகைகளுக்கும், பச்சை மிளகாய்க்கும் தட்டுப்பாடு நிலவுவதுடன் விலையும் அதிகமாகவே காணப்படுகின்றது. இந்நிலையில் நேற்றில் இருந்து நாவிதன் வெளிப்பிரதேசத்தினையும் கல்முனை நகரையும் இணைக்கும் கிட்டங்கி வீதியின் மேலாலும் நீர்பாய ஆரம்பித்துள்ளமையினால் இதனூடாக போக்குவரத்தும் தடைப்படும் அபாயம் ஏற்பட்டுள்ளது. அதேவேளை வெல்லா வெளிப் பிரதேச செயலகப் பிரவில் மூங்கிலாறு பெருக்கெடுத்து பல ஏக்கர் வயல் நிலங்கள் நீரில் மூழ்கும் அபாயம் தோன்றியுள்ளது.