வடக்கில் ராணுவத்தினர் இருப்பது சிறுவர்களின் மனநிலைக்கு பாதிப்பு!

June 19th, 2012 அன்று பிரசுரிக்கப்பட்டது.

வடக்கில் இலங்கை இராணுவத்தினர் தொடர்ந்தும் காணப்படுவது அங்குள்ள சிறுவர்களின் மனங்களில் பாதிப்பை ஏற்படுத்துவதாக சிறுவர் பாதுகாப்பு அமைப்பு ( Save the Children) தெரிவித்துள்ளது.

அவுஸ்திரேலிய ஊடகமொன்று இலங்கையில் போர் இடம் பெற்ற பகுதிகளில் சிறார்களின் நிலைவரம் குறித்தான நிகழ்ச்சி ஒன்றை நடத்தியது.

இதில் கலந்து கொண்ட சிறுவர் பாதுகாப்பு அமைப்பின் இலங்கைக்கான பிரதிநிதி மேனகா கல்யாண ரத்தினா இவ்வாறு தெரிவித்துள்ளார்.

சிறார்களின் நிலைவரம் குறித்து அவர் விபரிக்கையில்:

இலங்கையின் யுத்த பிரதேசங்களில் தொடர்ந்தும் இராணுவத்தினரின் பிரசன்னமானது சிறார்களின் மனங்களிலிருந்த போரின் வடுக்கள் ஆறுவதை தடுக்கிறது.

நிலக் கண்ணி வெடிகள் அகற்றப்படுவதனை முன்னிறுத்தி சில பகுதிகளில் இராணுவ பிரசன்னத்தினை நியாயப்படுத்தினாலும் இராணுவத்தினரது நடமாட்டம் என்பது போரினால் பயந்து போயிருக்கும் சிறார்களுக்கு கடந்த கால போரை நினைவூட்டுகின்றது.

அத்தோடு அந்த நினைவூட்டல் போர் இன்னமும் முடியவில்லை என்ற ஒரு தோற்றப்பாட்டை ஏற்படுத்துகின்றது.

இலங்கையின் வடக்கிலிருக்கும் சிறார்களை அவர்களின் சொந்த ஊர்களில் திரும்பவும் குடியமர்த்தி, கல்வி, மற்றைய தேவைகளை வழங்கி மற்றவர்களுடன் சம சந்தர்ப்பம் கிடைக்கச் செய்வதற்கு முக்கியத்துவம் கொடுக்க வேண்டும்.

இவ்வாறு சிறுவர் பாதுகாப்பு அமைப்பின் இலங்கைக்கான பிரதி நிதி மேனகா கல்யாண ரத்தினா குறிப்பிட்டுள்ளார்.