பெப்ரவரி இறுதியில் உண்ணாவிரதம்; தமிழக விவசாயிகள் சங்கம் முடிவு

பெப்ரவரி இறுதியில் உண்ணாவிரதம்; தமிழக விவசாயிகள் சங்கம் முடிவு



காவிரி டெல்டாவில் உள்ள அனைத்து விவசாயிகளுக்கும் ஏக்கருக்கு 20,000 ரூபா இழப்பீடு
வழங்கக்கோரி பெப்ரவரி மாத இறுதியில் தஞ்சாவூர் மாவட்டம், ஒரத்த நாட்டில் உண்ணாவிரதப்
போராட்டம் நடத்த தமிழக விவசாயிகள் சங்கம் முடிவு செய்துள்ளது.
தஞ்சாவூரில் இச் சங்கத்தின் மாவட்டக் கூட்டம் சனிக்கிழமை நடைபெற்றது. இதில்
எடுக்கப்பட்ட முடிவுகள் குறித்து சங்கத்தின் மாநிலத் தலைவர் எம்.ஆர்.
சிவசாமி
செய்தியாளர்களிடம் தெரிவித்தது: காவிரி நீர் வராததால் கருகிய பயிர்களுக்காக டெல்டா
விவசாயிகளுக்கு தமிழக அரசு ஏக்கருக்கு 15,000 இழப்பீடு வழங்குவதாக அறிவித்துள்ளது.
ஆனால் இது அனைத்து விவசாயிகளுக்கும் கிடைக்காது.
டெல்டா மாவட்டங்களில் 12 இலட்சம் ஏக்கர் சம்பா பயிர் சாகுபடி மேற்கொண்டதில் 3
இலட்சத்து 61 ஆயிரம் ஏக்கருக்கு மட்டும்தான் இழப்பீடு அறிவிக்கப்பட்டுள்ளது.
மீதமுள்ள 8 இலட்சத்து 39 ஆயிரம் ஏக்கரில் ஏற்பட்டுள்ள பயிர் இழப்புக்கு இழப்பீடு
அறிவிக்கப்படவில்லை. இது மிகுந்த ஏமாற்றத்தை அளிக்கிறது.
காவிரி டெல்டாவில் நெல் உற்பத்தி செய்ய ஏக்கருக்கு 30,000 ரூபா செலவாகிறது. அதில்
பாதி 15,000 ரூபா இழப்பீடாக அறிவிக்கப்பட்டுள்ளது.
இந்த இழப்பீடும் மொத்த சாகுபடியில் 3 இலட்சத்து 61 ஆயிரம் ஏக்கருக்குத்தான் எனக்
கூறப்பட்டுள்ளது.
காவிரி நீர் வாரமல் விவசாயிகள் அனைவரும் கடுமையாகப் பாதிக்கப் பட்டுள்ள போது சதவீதம்
அடிப்படையில் பிரித்து இழப்பீடு கொடுப்பது சரியல்ல. இது ஊழலுக்கும் வழி வகுக்கும்.
எனவே, அனைத்து விவசாயிகளுக்கும் 20,000 ரூபா வறட்சி நிவாரணம் அறிவிக்க வேண்டும்.
அனைத்து காவிரி டெல்டா விவசாயிகளுக்கும் ஏக்கருக்கு 20,000 ரூபா வீதம் இழப்பீடு
வழங்கக் கோரி பெப்ரவரி மாத இறுதியில் ஒரத்த நாட்டில் உண்ணாவிரதப் போராட்டம்
நடத்தப்படும் என்றார் சிவசாமி.
நன்றி தினகரன்