தனியார் பஸ் கட்டணங்களை அதிகரிக்கத் தேவை இல்லை

தனியார் பஸ் கட்டணங்களை அதிகரிக்கத் தேவை இல்லை

அகில இலங்கை தனியார் பஸ் உரிமையாளர் சங்க சம்மேளனம், தென் மாகாண தனியார் பஸ் உரிமையாளர்கள் சங்கம் ஆகியன தெரிவிப்பு
லக்ஷ்மி பரசுராமன்
பஸ் கட்டணங்களை தற்போதைக்கு அதிகரிக்க தேவையில்லையென அகில இலங்கை தனியார் பஸ் உரிமையாளர்கள் சங்க சம்மேளனம் மற்றும் தென் மாகாண தனியார் பஸ் உரிமையாளர் சங்கங்கள் ஆகியன அரசாங்கத்திற்கு ஆதரவு வழங்கியுள்ளன.

மீண்டுமொரு முறை டீசல் விலை அதிகரிக்கப்படும் வரை தொடர்ந்தும் அதே கட்டணத்துடன் தனியார் பஸ் சேவையை முன்னெடுத்துச் செல்ல தாம் தயாரென அவற்றின் தலைவர்களான ஸ்டென்லி பெர்னாண்டோ மற்றும் சந்தன ஆகியோர் தனியார் போக்குவரத்துத்துறை அமைச்சர் சி.பி. ரத்நாயக்கவுக்கு உத்தியோகபூர்வமாக அறிவித்துள்ளனர்.

தேசிய போக்குவரத்து ஆணைக்குழுவில் தனியார் போக்குவரத்து துறை அமைச்சர் சி.பி. ரத்நாயக்க தலைமையில் நேற்று நடைபெற்ற ஊடகவியலாளர் சந்திப்பிற்கு வருகை தந்திருந்த போதே அகில இலங்கை தனியார் பஸ் உரிமையாளர் சங்க சம்மேளனம் தமது இணக்கப்பாட்டினை பகிரங்கமாக அறிவித்தது.

கடந்த வருடம் பெப்ரவரி மாதம் டீசல் விலையில் ஏற்பட்ட திடீர் அதிகரிப்பினைத் தொடர்ந்து அமைச்சரவையின் அனுமதியுடன் கடந்த பெப்ரவரி 14ம் திகதி பஸ் கட்டணங்கள் அதிகரிக்கப்பட்டன. அப்போது தனியார் பஸ் உரிமையாளர் சங்கங்களுடன் எடுத்துக்கொண்ட தீர்மானத்தின்படி கடந்த ஜுலை முதலாம் திகதி, கொள்கையின் பிரகாரம் பஸ் கட்டணங்கள் மறுசீரமைக்கப்படுவதில்லை என்ற தீர்மானத்திற்கு வரப்பட்டது. இந்நிலையில் இவ்வருடமும் பெப்ரவரி 14 ஆம் திகதி பஸ் கட்டணத்தை அதிகரிக்குமாறு தனியார் பஸ் உரிமையாளர்கள் சங்கம் கோரிக்கை விடுப்பது நியாயமற்றதெனவும் மேற்படி இரு சங்கங்களும் வலியுறுத்தியுள்ளன.

இதேவேளை, ஜுலை முதலாம் திகதி வரை பஸ் கட்டணத்தில் எந்தவொரு மாற்றமும் செய்யப்படாதென அமைச்சர் சி.பி. ரத்நாயக்க நேற்று திட்டவட்டமாக அறிவித்தார்.

டீசல் கட்டணம் மீண்டுமொரு முறை அதிகரிக்கப்பட்டு பஸ் கட்டண கொள்கையின் பிரகாரம் 12 அம்சங்களின் விலை உயர்வின் சராசரி 8 சதவீதத்தால் அதிகரிக்கப்பட்டால் மாத்திரமே பஸ் கட்டணத்தில் மறுசீரமைப்பு செய்யப்படுமெனவும் அவர் இதன்போது உறுதியாக கூறினார்.

தனியார் பஸ் உரிமையாளர்கள் சங்கத் தலைவர் கெமுனு விஜேரட்ண மாத்திரமே அரசாங்கத்தின் கொள்கைகளை எதிர்த்து செயற்படுவது வருந்தத்தக்க செயலெனக் கூறிய அமைச்சர், அவருடைய கோரிக்கைகள் நிறைவேற்றப்படமாட்டாதெனவும் குறிப்பிட்டார்.

தினகரன்

#+ :”@: :”@: