குளித்தலை அருகே கோவில் திருவிழா நடத்துவதில் இருபிரிவினர் பயங்கர மோதல்

by *சம்ஸ் Mon 6 May 2013 - 7:50

குளித்தலை, மே. 6-

கரூர் மாவட்டம் குளித்தலையை அடுத்த தோகைமலை அருகே பாதிரிபட்டி கிராமம் உள்ளது. இங்குள்ள கன்னிமாரியம்மன் கோவில் திருவிழா ஆண்டுதோறும் அப்பகுதியை சேர்ந்த ஒரு சமூகத்தினரால் வெகுவிமரிசையாக கொண்டாடப்பட்டு வருகிறது.

இந்த திருவிழாவை அவர்கள் கடந்த 1 1/2 மாதங்களுக்கு முன்பு நடத்தி முடித்தனர். இதற்கிடையே அதே பகுதியில் வசித்து வரும் மற்றொரு பிரிவினர் தங்கள் சமூகம் சார்பில் கோவில் திருவிழா கொண்டாட முடிவு செய்து போஸ்டர்கள் அச்சடித்து ஒட்டினர்.

இன்று காலை பால்குடம் எடுக்கும் நிகழ்ச்சி நடைபெறுவதாக இருந்தது. இந்தநிலையில் நேற்று இரவு முதலில் திருவிழா கொண்டாடிய பிரிவினர் தற்போது திருவிழா கொண்டாட ஏற்பாடுகள் செய்து வரும் சமூகத்தினரிடம் மோதலில் ஈடுபட்டனர்.

குறைந்த எண்ணிக்கையில் இருக்கும் நீங்கள் இந்த கோவிலில் தனியாக திருவிழா நடத்தகூடாது என்று கூறி எதிர்ப்பு தெரிவித்தனர். இதில் ஏற்பட்ட பயங்கர மோதலில் ஒருபிரிவை சேர்ந்த ராமச்சந்திரன் என்பவரது வீடு புகுந்து தாக்கிய கும்பல் அவரது வீட்டில் நிறுத்தி வைத்திருந்த காரையும் அடித்து, உதைத்து சேதப்படுத்தினர்.

மேலும் இந்த தாக்குதலில் பெருமாள், நந்தினி (வயது 14) ஆகியோரும் பலத்த காயம் அடைந்தனர். அவர்கள் மணப்பாறை அரசு ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார்கள்.

இந்த சம்பவம் குறித்து தகவல் அறிந்த குளித்தலை துணை போலீஸ் சூப்பிரண்டு ஜமீம், தோகைமலை இன்ஸ்பெக்டர் முகமது இத்திரி மற்றும் போலீசார் மோதல் நடந்த கிராமத்துக்கு விரைந்து சென்று விசாரணை நடத்தி வருகிறார்கள்.

இன்று காலை போலீஸ் பாதுகாப்புடன் பால்குட ஊர்வலம் நடந்தது. தொடர்ந்து அங்கு பதட்டமான சூழ்நிலை நிலவி வருவதால் பலத்த போலீஸ் பாதுகாப்பு போடப்பட்டுள்ளது.