ஈரான் அணு பேச்சுவார்த்தை: இணக்கம் எட்டுவதில் தோல்வி

by **நண்பன்** Mon 11 Nov 2013 - 18:24

ஈரான் அணு பேச்சுவார்த்தை: இணக்கம் எட்டுவதில் தோல்வி
ஈரானின் அணுத் திட்டம் குறித்த ஈரான் மற்றும் உலக வல்லரசு நாடுகளுடனான பேச்சுவார்த்தையில் எந்த உடன்பாடும் எட்டுவதில் தோல்வி கண்டுள்ளது.

ஜெனீவாவில் மூன்று தினங்கள் நீடித்த இந்த பேச்சுவார்த்தையில் உறுதியான முன்னேற்றங்கள் ஏற்பட்டபோதும் ஒரு சில விடயங்களில் தொடர்ந்தும் கருத்து முரண்பாடு நிலவுவதாக ஐரோப்பிய ஒன்றிய வெளியுறவுக் கொள்கைகளுக்கான தலைவர் கதரின் அஷ்டன் குறிப்பிட்டார்.

இந்த பேச்சுவார்த்தையில் இணைப்பாளராக செயற்படும் அஷ்டன், எதிர்வரும் நவம்பர் 20 ஆம் திகதி மீண்டும் சந்தித்து பேச்சுவார்த்தை நடத்தப்படவுள்ளதாக குறிப்பிட்டார்.

சந்திப்பு முடிவு பற்றி அதிருப்தி அடையவில்லை என கூறியுள்ள ஈரான் வெளியுறவு அமைச்சர் மொஹமத் ஜாவத் சாரிப், பேச்சுவார்த்தை மூலம் ஒருசில விடயங்களை சீர் செய்ய முடிந்தது என்றார். அனைத்து தரப்பும் ஒரே சிந்தனை போக்கில் செயற்படுவதாக கூறிய அவர் இது தீர்வொன்றை எட்டுவதற்கு உந்துதலாக அமையும் என நம்பிக்கை தெரிவித்தார்.

மறுபுறத்தில் அமெரிக்க இராஜாங்கச் செயலாளர் ஜோன் கெர்ரி கூறும்போது, “முன்னரை விடவும் நாம் நெருங்கியிருக்கிறோம் என்பதில் எந்த சந்தேகமும் இல்லை” என்றார்.

ஈரான் அணு ஆயுதம் தயாரிக்க முயற்சிப்பதாக சர்வதேச சக்திகள் சந்தேகம் வெளியிட்டு வருகின்றன. ஆனால் தனது அணு செயற்பாடு அமைதியான நோக்கம் கொண்டது என ஈரான் குறிப்பிடுகிறது. ஈரான் தனது அணு செயற்பாடுகளை விரிவுபடுத்துவதை நிறுத்தும் பட்சத்தில் அதன் மீதான பொருளாதார தடைகளில் தளர்வை ஏற்படுத்த நிபந்தனை விதிக்கப்பட்டுள்ளது. எவ்வாறாயினும் ஈரான் தனது யுரேனியம் செறிவூட்டு உரிமையை விட்டுக்கொடுக்காது என ஈரான் ஜனாதிபதி ஹஸன் ரவ்ஹானி நேற்று வலியுறுத்தினார்.