குஜராத்தின் “ராணி-கி-வாவ்’ படித்துறை கிணறு உலக புராதன சின்னம்

-
“ராணி-கி-வாவ்’ படித்துறை கிணறு.
குஜராத்தில் உள்ள 11ஆம் நூற்றாண்டில் அமைக்கப்பட்ட புகழ்பெற்ற “ராணி-கி-வாவ்’ படித்துறை கிணற்றை சர்வதேச புராதனச் சின்னமாக ஐ.நா. சபையின் யுனெஸ்கோ அமைப்பு அறிவித்துள்ளது.
இதுகுறித்து மத்திய கலாசாரத்துறை அமைச்சகம் ஞாயிற்றுக்கிழமை வெளியிட்ட அறிக்கையில் கூறியிருப்பதாவது:
நாட்டின் நீர்வளப் பாதுகாப்பு அமைப்புகளுக்கு சிறந்த எடுத்துக்காட்டாக விளங்கும் ராணி-கி-வாவ் கிணற்றுக்கு சர்வதேச புராதனச் சின்னமாக யுனெஸ்கோ அமைப்பு அங்கீகாரம் அளித்திருப்பது அதற்கு கூடுதல் பெருமையை சேர்த்துள்ளது.
கத்தார் நாட்டில் உள்ள தோஹா நகரில் நடைபெற்றுவரும் யுனெஸ்கோவின் உலக பாரம்பரிய கமிட்டி கூட்டத்தில் இந்த அறிவிப்பு வெளியானது. பிரளயத்தின் காரணமாக சரஸ்வதி நதி அழிந்ததைத் தொடர்ந்து ஏற்பட்ட வெள்ளத்தில் இந்தக் கிணறும் பூமிக்குள் புதையுண்டது.
-
இந்திய தொல்லியல்துறையினர் மேற்கொண்ட அகழ்வாராய்ச்சியில் சுமார் 700 ஆண்டுகள் கழித்து மீண்டும் இந்த கிணறு கண்டுபிடிக்கப்பட்டது.
-
7 அடுக்குகள் கொண்ட ராணி-கி-வாவ் படித்துறை கிணற்றின் கட்டுமான அமைப்புகள் தற்போதும் உறுதியாக உள்ளன. ஒவ்வொரு அடுக்கிலும் கலைநயத்துடன் கூடிய அழகிய சிற்பங்கள் அமைக்கப்பட்டுள்ளன. மரூ-குர்ஜாரா வம்சத்தினரால் அமைக்கப்பட்ட ராணி-கி-வாவ் கிணறு அந்த காலகட்டத்தில் கட்டடத்துறை சிறப்பாக விளங்கியதை எடுத்துக் காட்டுகிறது.
-
நாட்டில் ஏற்கெனவே யுனெஸ்கோ அங்கீகாரம் பெற்ற 30 உலகப் பாரம்பரியச் சின்னங்கள் உள்ளன. இதில் 24 கலாசார தலங்களும், 6 இயற்கை தலங்களும் அடங்கும். தற்போது ராணி-கி-வாவ் கிணற்றுக்கும் அந்த அங்கீகாரம் கிடைத்துள்ளது என்று அந்த அறிக்கையில் கூறப்பட்டிருந்தது.
-
மேலும், கத்தாரில் நடைபெறும் உலகப் பாரம்பரிய கமிட்டி கூட்டத்தில் ,ஹிமாசலப் பிரதேசத்தில் உள்ள இமயமலை தேசிய பூங்காவையும் உலகப் புராதனச் சின்னமாக அறிவிப்பது குறித்து திங்கள்கிழமை முடிவு எடுக்கப்படும் என அரசு வட்டாரங்கள் தெரிவித்தன.
-
மோடி பாராட்டு: ராணி-கி-வாவ் கிணற்றை உலகப் புராதனச் சின்னமாக தேர்ந்தெடுத்த யுனெஸ்கோ அமைப்புக்கு பிரதமர் நரேந்திர மோடி பாராட்டு தெரிவித்துள்ளார்.
-
நன்றி: தினமணி

நல்ல செய்தி இம்மாதிரி பல புரதான வரலாற்று சான்றுகள் இந்திய தேசம் முழுதும் இன்னும் புதைந்துதான் கிடக்கின்றன