இந்தியா, பாகிஸ்தான் இடையே விசா விதிமுறைகள் தளர்த்தப்படுகின்றன

இந்தியா, பாகிஸ்தான் இடையே விசா விதிமுறைகள் தளர்த்தப்படுகின்றன
இந்தியா, பாகிஸ்தான் நாடுகளுக்கு இடையிலான விசா விதிமுறைகளை தளர்த்த முடிவு செய்யப்பட்டுள்ளது. இரு நாட்டு வெளியுறவு மந்திரிகள் மட்டத்திலான பேச்சு வார்த்தையின் போது, இதற்கான முடிவு எடுக்கப்படும்.

இந்தியா- பாகிஸ்தான் இடையே இரு தரப்பு பேச்சு வார்த்தைகள் நடைபெற்று வருகின்றன. அதிகாரிகள் மற்றும் வெளியுறவு செயலாளர்கள் மட்டத்தில் இந்த பேச்சுவார்த்தை தொடருகிறது. இந்த நிலையில், இரு நாடுகளுக்கு இடையே இலகுவான விசா நடைமுறைகளை அமுல்படுத்த முடிவு செய்யப்பட்டுள்ளது.

இதற்காக, ஏற்கனவே உள்ள விசா ஒப்பந்தத்தில் திருத்தம் செய்வதற்கான பணிகளை இறுதி செய்ய கூட்டு செயல் திட்ட குழு கூட்டம் நடைபெற்று வருகிறது. அதன் தொடர்ச்சியாக இரு நாட்டு வெளியுறவு மந்திரிகள் மட்டத்திலான சந்திப்பு நடைபெறும் சமயத்தில் விசா விதிமுறை திருத்தம் கையெழுத்தாகி அமுலுக்கு வரும். புதிய விசா விதிமுறைகளை இரு நாடுகளும் ஒப்புக் கொண்டு ஒப்பந்தம் கையெழுத்தானால், இந்தியாவும் பாகிஸ்தானும் முதன் முறையாக சுதந்திரமான ‘விசா’ பகுதிகளாக இருக்கும்.

புதிய விதிகளின்படி பத்திரிகையாளர், தொழிலதிபர்கள், 12 வயதுக்கு உட்பட்ட குழந்தைகள், 60 வயதுக்கு மேற்பட்ட முதியவர்கள், மருத்துவ சிகிச்சை பெற வரும் நோயாளிகள் ஆகியோருக்கு விசா விதிமுறைகள் தளர்த்தப்படும். இத்தகைய ‘விசா’ க்கள் மூலமாக முக்கிய நகரங்களுக்கு மட்டுமல்லாமல் நாடு முழுவதும் செல்ல முடியும்.

இரு நாட்டு மக்களும் ஒருவரை ஒருவர் சந்தித்து புரிந்துணர்வை அதிகப்படுத்துவதற்காக இத்தகைய நடவடிக்கைகளை மேற்கொள்வதாக வெளியுறவுத் துறை உயர் அதிகாரி ஒருவர் தெரிவித்தார். பாகிஸ்தானைச் சேர்ந்த ஒருவர், எந்த நகரின் வழியாக இந்தியாவுக்குள் வருகிறாரோ? அந்த நகர் வழியாகவே பாகிஸ்தானுக்கு திரும்ப வேண்டும் என்ற விதிமுறை தற்போது உள்ளது. இதையும் இந்தியா ரத்து செய்கிறது. இந்தியாவின் எந்தவொரு நகரின் வழியாகவும் அவர்கள் திரும்பலாம்.

வெளியுறவு செயலாளர் பயணம்

இதற்கிடையே, வெளியுறவு செயலாளர் மட்டத்திலான இரண்டு நாள் பேச்சு வார்த்தையில் கலந்து கொள்வதற்காக மத்திய வெளியுறவு செயலாளர் நிருபமாராவ், நேற்று முன்தினம் இஸ்லாமாபாத் சென்றார். அவருடன் வெளியுறவு இணைச் செயலாளர்கள் யாஷ்சின்கா, வெங்கடேஷ் வர்மா, இந்திய தூதர் சரத் சபர்வால் மற்றும் உயர் அதிகாரிகள் குழுவும் சென்றது.

பாகிஸ்தான் வெளியுறவு செயலாளர் சல்மான் பஷிருடன் முதல் நாள் பேச்சு வார்த்தையை இந்திய குழுவினர் தொடங்கினர். அமைதி, பாதுகாப்பு, அணுசக்தி என மூன்று பிரிவாக பேச்சு வார்த்தை பிரிக்கப்பட்டது. அமைதி மற்றும் பாதுகாப்பு தொடர்பாக முதல் சுற்று பேச்சு வார்த்தை நேற்று முன்தினம் நடந்தது. நேற்று நடைபெற்ற பேச்சு வார்த்தையில் காஷ்மீர் மற்றும் அணுசக்தி விவகாரங்கள் இடம் பெற்றன.

நல்ல விடயம் தகவலுக்கு நன்றி