மர்மமனிதன் சர்ச்சை: இறக்காமத்தில் அகப்பட்ட சந்தேக நபர் மன நோயாளி

by **நண்பன்** Sat 6 Aug 2011 - 4:08

மர்மமனிதன் சர்ச்சை:
இறக்காமத்தில் அகப்பட்ட சந்தேக நபர் மன நோயாளி
அம்பாறை மத்திய குறூப் நிருபர்
வரிப்பத்தான் சேனையில் பிடிபட்டு இறக்காமம் பொலிஸ் நிலையத்தில் ஒப்படைக்கப்பட்ட மர்ம மனிதன் என சந்தேகிக்கப்படுபவர் சம்மாந்துறையைச் சேர்ந்த ஒரு மனநோயாளி என பொலிஸாரின் ஆரம்பக்கட்ட விசாரணைகளிலிருந்து தெரிய வந்துள்ளது.

குறித்த சந்தேக நபர் அக்கரைப்பற்று நீதிவான் நீதிமன்றத்தில் தமண பொலிஸாரால் ஆஜர்படுத்தப்பட்ட பின், இவரை விளக்கமறியலில் வைக்குமாறு நீதிவான் ரி. ரணராஜா உத்தரவு பிறப்பித்துள்ளார். மேலும் இவரை மட்டக்களப்பு மன நோய் வைத்திய சாலையில் சேர்த்து சிகிச்சைக்குட்படுத்தி, அதற்கான அறிக்கையினை பெற்றுக் கொள்ளுமாறும் நீதிவான் பொலிஸாரைப் பணித்துள்ளார்.

வரிப்பத்தான் சேனை இளைஞர்களால் பிடிக்கப்பட்ட மர்ம மனிதன் என சந்தேகிக்கப்படும் இவர், இறக்காமம் பொலிஸ் நிலையத்தில் ஒப்படைக்கப்பட்டிருந்த வேளையிலே இவரை தம்மிடம் ஒப்படைக்குமாறு கோரி இறக்காமம் பொலிஸ் நிலையம் மீது கடந்த புதன்கிழமை இரவு பொது மக்களால் தாக்குதல் நடத்தியமையும் குறிப்பிடத்தக்கது.

இது ஒரு புறமிருக்க, நேற்று (வெள்ளி) அதிகாலை 1.30 மணியளவில் மர்ம மனிதர்கள் என சந்தேகிக்கப்படுபவர்களால் இறக்காமத்தின் சில வீடுகளுக்குச் சென்று பெண்களுக்கு தொல்லை கொடுத்துள்ளனர். இதனால் இறக்காமம் வரிப்பத்தான்சேனை பிரதேசங்களில் தொடர்ந்தும் பயமும், பீதியும், நிலவுவதால் மக்கள் மத்தியில் அச்ச உணர்வு தலை தூக்கியுள்ளமையும் குறிப்பிடத்தக்கது.