ஜெயலலிதாவை தாக்கி பேசியதால் கோத்தபாயவின் கொடும்பாவி எரிப்பு

by **நேசமுடன் ஹாசிம்** Wed 10 Aug 2011 - 11:22

தமிழக முதல்வர் ஜெயலலிதாவுக்கு எதிராக இலங்கை பாதுகாப்பு அமைச்சின் செயலாளர் கோத்தபாய ராஜபக்ச தெரிவித்த கருத்துக்களை கண்டித்து,

புதுச்சேரியில் புதுவை மாநில அதிமுக சார்பில் அண்ணா சாலை அருகே கோத்தபாய ராஜபக்சவின் கொடும்பாவிக்கு செருப்பு மாலை அணிவித்து போராட்டம் நடத்தப்பட்டது.

பொலிஸார் கொடும்பாவியை எரிக்க விடாது தடுத்த போதும், கொடும்பாவி பாதி எரிந்த நிலையிலேயே அணைக்கப்ப்ட்டது.

பின்னர் இப் போராட்டம் குறித்து பேசிய புதுவை மாநில் அதிமுக செயலாளர் அன்பழகன் ' ஈழத் தமிழ் மக்களின் உயிரை மதிக்காமல் ஆயுதமேந்தாத அப்பாவி மக்களைக் கொன்று குவித்த சிங்கள வெறியன் ராஜபஸவுக்கு எதிராகவும் போர்குற்றவாளிகளுக்கு எதிராகவும் அம்மா தீர்மானம் நிறைவேற்றினார்.

ஆனாலும் மத்திய அரசு இன்னமும் அசைந்து கொடுக்கவில்லை. ஆனால் தமிழின விரோதிகளுக்கு டில்லியில் சிகப்புக் கம்பள வரவேற்புக் கொடுத்து வருகிறது காங்கிரஸ் கட்சி. அந்த துணிச்சலில்தான் கோத்தபயராஜபஷே அம்மாவுக்கு எதிராக பேசுகிறார். ஆணவத்துடன் திமிராக எங்கள் அம்மாவுக்கு எதிராகப் பேசிய கோத்தபய கும்பலைக் கண்டித்து புதுவை, தமிழகம் முழுக்க போராட்டம் முன்னெடுக்கப்படும் அம்மாவின் அனுமதியைப் பெற்று இலங்கையில் போர்க்குற்றவாளிகள் தண்டிக்கப்படும் வரை போராடுவோம் என கூறினார்.

கோத்தபாய ஹெட்லைன்ஸ் டுடே ஆங்கில ஊடகத்திற்கு அளித்த பேட்டியில் இலங்கைக்கு பொருளாதார தடை விதித்த தமிழக சட்டமன்ற தீர்மானத்தை கடுமையாக விமர்சித்ததுடன், ஜெயலலிதா அரசியல் சுயலாபங்களுக்காக தமிழர் நலன் குறித்து பேசுவதாகவும், உண்மையில் அவர்களுக்கு உதவுவதாக இருந்தால் நேரடியாக பாதிக்கப்பட்ட மக்களுக்கு உதவ வேண்டுமெனவும் அவர் தெரிவித்திருந்தார்.