ரிசானா நபீக் விவகாரம்:

ரிசானா நபீக் விவகாரம்:

குழந்தையின் பெற்றோருடன் சமரசத்துக்கு
செல்லுமாறு சவூதி நீதிமன்று உத்தரவு



சவூதி அரேபியாவில் மரணதண்டனை விதிக்கப்பட்டிருக்கும் ரிசானா நபீக்கின் விடுதலை
தொடர்பாக, உயிரிழந்த பெற்றோருடன் சமரசத் தீர்வொன்றுக்குச் செல்லுமாறு றியாத் அரச
நீதிமன்றம் உத்தரவிட்டுள்ளது.
உயிரிழந்த பிள்ளையின் பெற்றோருடன் சமரசத் தீர்வொன்றுக்குச் செல்லுமாறு அந்நீதிமன்றம்
அறிவித்திருப்பதாக அராப் நியூஸ் செய்தி வெளியிட்டுள்ளது. ரிசானா நபீக் பற்றிய வழக்கை
அரச நீதிமன்றம் உள்நாட்டு அமைச்சினூடாக றியாத் ஆளுநனர் மன்றுக்கு புனித ரமழான்
மாதத்தின் முதல் வாரத்தில் அனுப்பியுள்ளதாகவும் அராப் நியூஸ் தனது செய்தியில் மேலும்
குறிப்பிட்டுள்ளது.
ரிசானா நபீக்கை விடுதலை செய்வதற்கு நடவடிக்கை எடுக்குமாறு ஜனாதிபதி மஹிந்த ராஜபக்ஷ,
சவுதி மன்னரிடம் கோரிக்கை விடுத்திருந்தார். இந்நிலையில், குழந்தையின் பெற்றோரே இது
தொடர்பில் தீர்மானிக்க முடியுமென தெரிவிக்கப்பட்டிருந்தது. இந்த நிலையிலேயே
குழந்தையின் பெற்றோருடன் சமரசத் தீர்வொன்றுக்கு வருமாறு அரச நீதிமன்றம்
அறிவித்திருப்பதாக செய்தி வெளியாகியுள்ளது.
இலங்கைத் தூதுவரான அஹமட் எ. ஜவாட், ரிசானா நபீக்கின் பிரச்சினையின் தற்போதைய நிலைமை
பற்றி அறிந்து கொள்வதற்காக றியாத் பaல் ஆளுநர் இளவரசர் சத்தாமை கடந்தவாரம்
சந்தித்திருந்தார்.
இக்கலந்துரையாடலின் போது குறிப்பிட்ட வழக்கை ஆளுநர் மன்றின் இணக்கசபை ஆராய்ந்து
வருவதாகவும், உயிரிழந்த பிள்ளையின் பெற்றோர்களுடன் ஆளுநர் மன்றின் இணக்கசபை
உறுப்பினர்கள் பேச்சுவார்த்தை நடத்தி வருவதாகவும் இளவரசர் சத்தாம் கூறினார்.
இவ்வாறன பேச்சுவார்த்தைகள் இரத்தப் பணம் வழங்கப்படுவதன் மூலம் அல்லது
பாதிக்கப்பட்டவர்களினால் கருணையோ வழங்கப்படும் மன்னிப்பபின் மூலம்
தீர்மானிக்கப்படுகின்றன. பேச்சுவார்த்தை எவ்வளவு காலத்தில் முடியும் எனக் கூற
முடியாது. இது சில வாரங்கள் தொடக்கம் பல மாதங்கள் வரை போகலாம் என்றும் அச்செய்தியில்
மேலும் குறிப்பிடப்பட்டுள்ளது.
வெளிநாட்டு வேலைவாய்ப்பு ஊக்குவிப்பு மற்றும் நலன்புரி சேவை அமைச்சரான டிலான் பெரேரா,
ரிசானாவுக்கு மன்னிப்பு பெறுவது பற்றி ஆராய்வதற்காக கடந்த வாரம் றியாத் நகருக்குச்
சென்றார். அமைச்சருடன் வெளிநாட்டு வேலைவாய்ப்பு பணியகத்தின் தலைவர் கிங்ஸ்லி
ரணவக்கவும் சென்றிருந்தார்.
இவர்கள் ரிசானாவுக்கு மன்னிப்பு அளிக்குமாறு உயிரிழந்த பிள்ளையின் பெற்றோருடன்
பேசுவது பற்றி அதிகாரிகளுடன் பேசியுள்ளனர். பிள்ளையின் பெற்றோர் மன்னிப்பு
வழங்கினால் மட்டுமே ரிசானாவை காப்பாற்ற முடியுமென சவூதி அரேபிய சட்ட நிபுணர்கள்
கூறியிருப்பதாகவும் அராப் நியூஸ் தனது செய்தியில் மேலும் குறிப்பிட்டுள்ளது.

இதுதான் இஸ்லாமிய சட்டம் ...பாதிக்கப் பட்டவர்கள் மன்னிக்கவேண்டும் ...இது பற்றி அல்லாஹ் குரானில் சொல்லும் வசனங்கள் அந்த பெற்றோருக்கு உரிய முறையில் எடுத்துச்சொல்லப் படவேண்டும் ....அவர்கள் மன்னித்தால் அதற்கான கூலி அல்லாஹ்விடம் அவர்கள் பெற்றுக் கொள்வார்கள்